54:446  il  portera  la  mitre  cornue  sur  la  teste,  et  que  cependant  il  ouvrira  la  bouche  pour  parler  de  Dieu.  Voila  donc  pour  monstrer  qu'on  ne  se  doit  point  estonner  de  toute  la  vanterie  dont  les  Papistes  usent,  et  qu'ils  pretendent  pour  monstrer  qu'ils  ont  l'Eglise  de  leur  coste:  car  il  faloit  en  premier  lieu  que  leurs  Prelats  et  Evesques  (qu'ils  appellent)  fussent  ministres  de  la  parole  de  Dieu.  Voila  pour  un  item.  Or  notamment  S.  Paul  dit,  Parole  fidele.  Car  si  nous  n'avons  discretion  entre  ce  qui  est  de  Dieu,  et  ce  qui  aura  este  forge  des  hommes,  il  n'y  aura  qu'opiniastrete  en  nous.  Il  faut  donc  que  nous  cognoissions  que  la  doctrine  pour  laquelle  nous  combatons  est  de  Dieu,  car  autrement  il  n'y  aura  nulle  certitude.  Nous  scavons  que  les  hommes  de  leur  nature  sont  adonnez  a  vanite  et  mensonge:  il  faut  donc  que  nous  soyons  fondez  en  Dieu,  pour  estre  certains  de  nostre  foy.  Et  ainsi  retenons  que  la  religion  seroit  nulle  et  frivole,  sinon  que  la  doctrine  qui  est  preschee  entre  nous  face  fruict  :  c'est  a  dire,  que  nous  n'ayons  nulle  doute  qu'elle  ne  soit  de  Dieu,  afin  d'y  estre  du  tout  asseurez.  Et  en  ceci  voit-on  derechef  qu'en  la  Papaute  il  n'y  a  que  confusion  horrible.  Car  si  on  demande  la  d'estre  enseigne  par  la  parole  de  Dieu,  il  n'en  est  point  de  question:  car  il  se  faut  contenter  de  ce  qu'il  aura  pleu  aux  hommes  de  forger  a  leur  appetit:  il  n'y  a  nulle  discretion:  mesmes  ils  voudroyent  que  les  hommes  s'abbrutissent  du  tout:  car  on  ne  peut  croire  a  leur  guise,  sinon  qu'on  soit  despouille  de  tout  sens  et  raison.  Il  est  vray  que  l'entree  de  la  foy  est  de  rendre  obeissance  a  Dieu,  que  nous  soyons  comme  fols,  c'est  a  dire  vuides  de  nostre  sens  propre:  mais  cependant  si  est-ce  qu'il  nous  faut  avoir  ceste  prudence  d'escouter  Dieu,  et  nous  scachions  que  c'est  luy  qui  parle,  tellement  que  nous  ayons  ceci  pour  tout  resolu,  que  la  doctrine  que  nous  tenons  est  fidele.  Mais  notons  bien  encores  que  sainct  Paul  veut  qu'on  esprouve  toute  doctrine  pour  en  ratifier  l'authorite,  afin  qu'elle  profite.  Car  ce  n'est  point  assez  qu'un  homme  puisse  alleguer  qu'il  n'a  mis  nul  erreur  en  avant,  qu'on  ne  le  peut  redarguer  de  faussete:  c'est  bien  desia  quelque  chose,  mais  ce  n'est  pas  le  tout.  Car  si  ie  vouloye  disputer  de  vaines  speculations,  et  qu'on  ne  rapportast  de  ce  que  i'auray  dit  sinon  ie  ne  scay  quoy  qui  ne  servist  de  rien  pour  edifier  en  la  crainte  de  Dieu,  et  en  la  fiance  de  sa  bonte,  qui  fust  pour  nous  certifier  de  nostre  salut,  qui  fust  pour  nous  inciter  a  prieres  et  oraisons,  et  pour  nous  exercer  a  patience,  que  tout  cela  n'y  fust  point,  mais  seulement  que  i'eusse  mis  en  avant  quelque  subtilite  qui  fust  plaisante,  ascavoir  s'il  suffiroit  que  ie  n'eusse  amene  nulle  faussete  en  avant.  Nenni:  car  cela  est  prophaner  la  parole  de