47:446  hodie  non  secus  intuemur  Christum  in  evangelio,  ac  si  praesentem  se  nobis  sisteret.  Quo  sensu  dicit  Paulus  ad  Galatas  (3,  1),  crucifigi  eum  ante  oculos  nostros.  Quare,  si  cupimus  in  Christo  videre  quod  nos  felices  ac  beatos  reddat,  discamus  credere  non  videndo.  His  Christi  verbis  respondet  quod  habetur  1.  Petr.  1,  8,  ubi  laudantur  fideles,  qui  Christum  diligunt  quem  non  viderunt,  et  exsultant  gaudio  inenarrabili,  quamvis  eum  non  adspiciant.  Quod  autem  papistae  haec  verba  torquent  ad  suam  transsubstantiationem  probandam,  plus  quam  frivolum  est.  Ut  beati  simus,  credere  nos  iubent  Christum  esse  in  specie  panis.  Sed  nihil  minus  fuisse  Christo  propositum  scimus  quam  ut  fidem  subiiceret  hominum  commentis:  quae  si  minimum  transsiliat  ultra  verbi  metas,  desinit  iam  esse  fides.  Si  credere  promiscue  oportet  quae  non  videntur,  quiquid  prodigiorum  fingere  hominibus  placuerit,  quidquid  fabularum  effutire,  fidem  nostram  habebit  obstrictam.  Ergo  ut  locum  habeat  haec  Christi  sententia,  imprimis  probandum  est  ex  verbo  Dei  id  de  quo  ambigitur.  Verbum  quidem  pro  sua  transsubstantione  afferunt,  sed  quod  probe  expositum  nihil  eorum  delirio  suffragatur.  30.  Multa  quidem  etiam  alia  signa  fecit  Iesus  coram  discipulis  suis,  quae  non  sunt  scripta  in  libro  hoc.  31.  Haec  autem  scripta  sunt  ut  credatis  quod  Iesus  est  Christus  filius  Dei,  et  ut  credentes  vitam  habeatis  in  nomine  ipsius.  30.  Multa  quidem.  Nisi  addita  fuisset  ista  occupatio,  putassent  lectores,  nullum  ex  miraculis,  quae  Christus  edidit,  a  Ioanne  fuisse  omissum,  seque  hic  plenam  habere  et  integram  omnium  historiam.  Primum  ergo  testatur  Ioannes,  quaedam  tantum  ex  multis  se  scripsisse:  non  quod  alia  memoratu  indigna  fuerint,  sed  quia  haec  ad  fidem  aedificandam  satis  erant.  Neque  tamen  inde  sequitur,  frustra  fuisse  edita,  quia  illi  saeculo  proderant.  Deinde,  etiamsi  hodie  nobis  ignotae  sint  eorum  species,  pro  nihilo  tamen  minime  ducendum  est,  quod  tenemus  ingenti  miraculorum  copia  obsignatum  fuisse  evangelium.  31.  Haec  autem  scripta  sunt  ut  credatis.  His  verbis  significat,  scriptis  se  mandasse  quod  nobis  satisfacere  deberet,  quia  abunde  sufficiat  ad  fidei  nostrae  confirmationem.  Vanae  enim  hominum  curiositati  occurrere  voluit,  quae  inexplebilis  est  et  nimis  licenter  sibi  indulget.  Porro  Ioannem  non  latebat,  quid  alii  etiam  evangelistae  scripsissent.  Quum  autem  nihil  minus  illi  fuisset  propositum  quam  abolere  eorum  scripta,  procul  dubio  eorum  narrationem  a  sua  non  separat.  Videtur  tamen  absurdum  esse,  fidem  in  miraculis  fundari,  quam  Dei  promissionibus  et  verbo  penitus  addictam  esse  oportet.  Respondeo,  non  alium  hic  usum  dari