37:445  445  CAPUT  LXVI.  446  pites  haerebimus  quin  protinus  succurrat  mundi  renovationem  esse  in  eius  manu,  cui  difficile  non  esset  creare  momento  uno  centum  mundos.  Nuper  admiratione  interposita  extollere  magnitudinem  operis  voluit:  nunc  vero  ne  quid  pias  mentes  impediat  vel  moretur  ad  reputandam  suam  virtutem  hortatur:  ac  quo  melius  persuadeat  nihil  tam  arduum  esse  coram  hominibus  quod  non  sibi  expeditum  sit  et  arbitrio  suo  subiaceat,  proponit  in  medium  ea  quae  ipsi  quotidie  cernimus  :  nam  in  partu  muliebri  admirabilem  eius  potentiam  intuemur  ac  suspicimus.  Annon  vero  se  Dominus  multo  admirabiliorem  praebebit  in  augenda  et  multiplicanda  ecclesia,  quae  praecipuum  est  gloriae  eius  theatrum?  Nimis  ergo  maligne  restringitur  eius  virtus,  si  minus  creditur  valere,  ubi  immediate  et  quasi  palam  exerta  manu  per  se  agere  volet,  quam  ubi  operatur  per  naturalia  media.  10.  (Laetamini.)  Promittit  laetum  fore  statum  qui  moestus  antea  et  lugubris  erat:  nam  respicit  Isaias  non  suam  aetatem,  sed  exsilii  tempus  quo  assidue  gemebant  pii,  ac  moerore  confecti  prope  desperabant.  Pios  igitur  omnes  ad  gaudium  hortatur  atque  incitat,  qui  singulari  affectu  erga  ecclesiam  ducuntur,  nec  quidquam  habent  optabilius  eius  salute.  Quo  admonet  non  alios  tanti  boni  consortes  fore  nisi  quos  pius  ecclesiae  amor  et  studium  ad  expetendam  eius  liberationem  sollicitat:  et  quidem  ubi  contemptibilis  est  coram  mundo,  sicuti  Psal.  102  (v.  15)  dicitur:  Quoniam  diligunt  mansueti  tui  lapides  eius,  et  pulveris  eius  miserebuntur.  Ideoque  addit  qui  lugetis:  nam  quia  in  exsilio  deformis  et  horrenda  dissipatio  erat,  nec  quidquam  salutis  amplius  sperabatur,  excitat  pios  ac  laeto  animo  esse  iubet,  vel  saltem  se  accingere  ad  gaudium.  Atque  haec  exhortatio  promissionem  quoque  et  plus  quiddam  continet.  Nec  enim  tantum  efficaciae  habuisset  simplex  promissio:  sed  ista  ad  unum  tempus  duntaxat  restringi  non  debent:  nam  tenenda  est  generalis  regula,  de  qua  iam  saepius  diximus.  Nempe  istas  promissiones  a  populi  reditu  usque  ad  regnum  Christi  et  complementum  eius  extendendas  esse.  11.  (Ut  sugatis.)  Hic  versus  superiori  coniungi  debet:  nam  propheta  exponit  qualis  gaudii  materia  futura  sit:  quia  scilicet  infelix  ac  miser  ecclesiae  status  in  beatum  et  felicem  mutabitur.  Sugendi  autem  verbo  ad  teneros  infantes  alludit:  ac  si  diceret:  Fruamini  matre  vestra  cum  bonis  omnibus  atque  a  mammis  eius  pendeatis.  Hic  vero  pueris  similes  facit  pios  omnes,  cuiuscunque  sint  aetatis,  ut  meminerint  infirmitatis  suae  ac  Domini  virtute  confirmentur.  Quamobrem  diligenter  haec  sugendi  et  mulgendi  metaphora  notanda  est.  Consolationum  vocem  alii  active,  alii  passive  accipiunt:  ego  vero  significationem  passivam  amplecti  malo.  Intelligit