8:444  triomphes  estoyent  au  sang  des  Martyrs:  et,  selon  qu'elle  estoit  riche  d'Esprit,  elle  estoit  desnuee  et  povre  des  biens  de  ce  monde:  [f.  75]  selon  qu'elle  estoit  precieuse  et  belle  en  sainctete  devant  Dieu  et  les  Anges,  elle  estoit  contemptible  au  monde.  Elle  avoit  beaucoup  d'ennemis  manifestes  qui  la  persecutoyent  cruellement,  ou  bien  qui  machinoyent  par  dessoubs  terre  de  la  ruiner  au  dedens.  Il  y  avoit  beaucoup  de  traistres  et  de  meschans  complots,  comme  le  diable  ne  cesse  iamais  de  Ia  molester  par  les  hypocrites.  Brief,  la  dignite  d'icelle  estoit  encores  cachee  soubs  la  croix  de  Christ.  D'autre  coste,  on  pouvoit  assez  iuger  que  toute  la  dignite  qu'elle  ha  est  spirituelle,  et  ainsi  qu'elle  ne  se  peut  veoir  par  les  yeulx  de  la  chair.  Pourtant  la  consolation  qui  est  yci  contenue  ne  laissoit  point  d'estre  bien  propre  et  opportune  en  ce  temps-la,  a  fin  que  les  fideles  fussent  advertis  de  penser  a  un  estat  plus  parfaict  de  l'Eglise,  que  celuy  qui  leur  estoit  apparent.  Mais  elle  nous  est  auiourd'huy  bien  plus  necessaire.  Il  y  a  ia  long  temps  que,  pour  les  pechez  de  nos  peres,  Dieu  a  permis  que  ce  noble  estat  et  magnifique  qu'il  avoit  dresse  en  son  Eglise,  ait  este  desfigure,  et  qu'il  y  soit  survenu,  au  lieu,  une  horrible  desolation.  Et  encores  de  present,  la  povre  Eglise  est  opprimee  par  nos  transgressions,  et  gemit  soubs  la  cruelle  tyrannie  des  adversaires  de  la  verite,  soubs  les  diffames  et  reproches  que  luy  font  ses  ennemis,  soubs  les  mocqueries  du  diable  et  des  iniques,  tellement  qu'il  n'y  a  rien  que  les  mondains,  qui  desirent  d'estre  a  leur  aise,  fuyent  plus  que  d'estre  tenus  et  reputez  du  nombre  des  fideles:  dont  il  advient  que  la  plus  part  se  separent  de  l'Eglise,  comme  si  on  n'en  povoit  estre  si  on  n'est  malheureux.  Dont  il  nous  est  facile  de  veoir  combien  la  doctrine  du  Pseaulme  present  nous  est  utile,  a  fin  que  nous  la  meditions  incessamment.  PSEAULME  LXXXVII.  1.  Aux  enfans  de  Core,  Pseaulme  de  cantique:  Ses  fondemens  sont  es  montaignes  sainctes*  Le  nom  des  enfans  de  Core  pourroit  estre  yci  mis,  non  pas  comme  ayans  compose  le  Pseaulme,  mais  pource  qu'ils  estoyent  ordonnez  musiciens  pour  le  chanter  au  Temple.  Combien  qu'on  pourroit  aussi  dire  que  quelcun  de  ceste  famille-la  en  auroit  este  autheur.  Quant  au  texte,  la  ou  il  est  dict  que  Ses  [f.  76]  fondemens  sont  es  montaignes  sainctes,