54:444  tesmoignage  par  un  tel  signe  que  nous  communiquons  vrayement  a  son  Fils  nostre  Seigneur  Iesus  Christ,  que  nous  le  prions  qu'il  nous  gouverne  tellement  par  son  sainct  Esprit,  que  nous  ne  venions  point  a  polluer  ceste  saincte  table,  mais  qu'ayans  cognu  que  nous  sommes  povres  et  miserables  creatures,  nous  venions  a  nostre  Seigneur  Iesus  Christ,  afin  qu'il  nous  purge  de  toutes  nos  macules,  comme  il  est  la  fontaine  de  toute  purete,  qu'il  nous  nettoye  tellement  que  nous  despouillions  tous  nos  vices,  afin  qu'ils  ne  regnent  point  en  nous,  combien  qu'ils  y  habitent:  mais  que  son  sainct  Esprit  domine  tellement  sur  nous,  qu'on  appercoyve  que  vrayement  nous  sommes  unis  a  luy,  que  nous  sommes  retirez  de  ce  monde  pour  cercher  les  choses  spirituelles  :  et  que  nous  bataillions  tellement  contre  les  vanitez  de  nostre  chair,  et  toutes  nos  affections  corrompues,  que  nous  ne  demandions  sinon  de  nous  conformer  de  plus  en  plus  a  son  image,  pour  estre  vrayement  recognus  et  advouez  pour  ses  enfans,  et  que  le  Pere  celeste  nous  veut  tenir  et  advouer  pour  ses  heritiers.  Or  nous-nous  prosternerons  devant  la  face  de  nostre  bon  Dieu,  etc.  SIXIEME  SERMON.  Chap.  I,  v.  7.9.  Apres  que  sainct  Paul  a  declare  quelle  doit  estre  la  vie  de  ceux  qui  anoncent  la  parole  de  Dieu  :  afin  qu'ils  puissent  tant  mieux  edifier,  quand  on  verra  que  c'est  a  bon  escient  qu'ils  parlent,  et  en  vraye  crainte  de  Dieu,  il  adiouste  ce  qui  est  le  principal:  c'est  ascavoir  qu'ils  persistent  constamment  en  bonne  doctrine  et  pure.  Or  ceci  presuppose  que  desia  ils  y  soyent  enseignez.  Et  telle  constance  ne  peut  estre  qu'il  n'y  ait  bon  fondement  en  premier  lieu.  Voila  en  quoy  nous  discernons  les  opiniastres  d'avec  ceux  qui  sont  constans.  Quand  un  homme  estant  estourdi  prendra  quelque  folle  phantasie  sans  instruction,  la  dessus  il  sera  tellement  obstine,  qu'il  ne  recevra  rien  qu'on  luy  dise.  Or  cela  ne  doit  point  estre  repute  a  vertu,  quand  un  homme  ne  change  point  propos,  qu'on  ne  luy  puisse  point  oster  une  folle  opinion  de  sa  teste:  mais  la  constance  doit  tousiours  estre  fondee  en  raison,  et  en  verite.  Sainct  Paul  donc  disant  que  les  Pasteurs  doyvent  tenir  la  doctrine  comme  s'ils  l'avoyent  embrassee  pour  iamais  ne  la  laisser  eschapper,  il  entend  qu'ils  soyent  deuement  informez  que  c'est  la  verite  de  Dieu  qu'ils  suyvent,  et  qu'ils  ayent  ceste  conclusion  bien  prinse  en  eux,  et  une  telle  certitude,  qu'ils  puissent  rendre  tesmoignage  qu'ils  scavent  bien  de  qui  ils  la  tienent,  afin  qu'on  ne  les  puisse  esbranler  ne  ca  ne  la.  Ainsi  en  somme,  sainct  Paul  declare  en  ce  passage  que  nul  n'est  propre  pour  gouverner  l'Eglise  de  Dieu,  sinon  qu'il  soit  suffisant  pour  enseigner.  Mais  il  adiouste  la  fermete  que  nous  avons  dite,  qu'un  homme  ne  soit  point  variable:  et  combien  que  les  vents  et  tourbillons  se  levent  de  tous  costez,  qu'il  persiste  en  ce  qu'il  cognoist  estre  de  Dieu.  Or  cependant  sainct  Paul  veut  que  la  doctrine  s'applique  a  l'instruction  du  peuple,  il  dit,  Parole  fidele,  qui  est  selon  doctrine,  c'est  a  dire,  qui  soit  propre  pour  edifier.  Car  Dieu  ne  veut  point  paistre  nos  aureilles  quand  il  commande  que  sa  Parole  nous  soit  preschee,  comme  il  y  en  a  beaucoup  qui  n'apportent  qu'une  folle  curiosite  quand  ils  vienent  au  sermon.  Or  Dieu  regarde  une  autre  fin,  c'est  que  nous  soyons  edifiez  a  profit,  comme  on  dit.  Il  y  a  donc  ce  poinct-la.  D'autrepart  sainct  Paul  adiouste  que  ce  n'est  point  assez  que  les  Pasteurs  conduisent  ceux  qui  se  rendent  dociles  et  suiets  de  leur  bon