25:444  mulet.  Etsi  enim  satis  apud  eos  valere  debebat  iurisiurandi  religio:  bis  tamen  inhumanum  ac  turpe  fuit  hospitae,  a  qua  liberati  fuerant,  non  referrre  gratiam.  Humanitatis  vero  est,  quod  de  patre  quoque  et  consanguineis  sollicita  est.  Naturale  id  quidem  :  sed  multi  ita  sibi  addicti  sunt,  ut  filii  patrum  morte  vitam  suam  redimere  non  dubitent:  tantum  abest,  ut  animum  et  studium  applicent  ad  eos  servandos.  14.  Anima  nostra  in  mortem.  Mortem  sibi  imprecantur,  nisi  Rahab  servandae  curam  fideliter  suscipiant.  Nam  quod  vertunt  quidam,  Trademus  animas  nostras,  videtur  remotum  vel  nimis  restrictum:  quando  non  aliud  propositum  est,  quam  se  coram  Deo  obligare.  Sese  igitur  tanquam  piacula  constituunt,  si  quid  adversi  patiatur  Rahab  eorum  negligentia.  Particulam  :  Pro  vobis,  ad  patrem,  fratres  et  sorores  referri  dubium  non  est.  Itaque  vitam  suam  obnoxiam  reddunt,  ut  ab  ipsis  exigatur  sanguis,  nisi  familia  Rahab  maneat  incolumis.  Atque  in  eo  sita  est  iurandi  sanctitas,  quamvis  impune  fallere  liceat  quoad  homines,  ut  Deus  tamen  interpositus  testis  rationem  perfidiae  reposcat.  Facere  misericordiam  et  veritatem  tantundem  Hebraeis  valet,  ac  fideliter,  sincere,  constanter  humanitatis  officio  defungi.  Exceptio  autem  inseritur,  modo  ne  Rahab  prodat  sermonem,  non  diffidentiae  causa,  ut  vulgo  exponunt:  sed  tantum  ut  melius  sibi  caveat  Rahab.  Fidelis  ergo  fuit  haec  admonitio,  et  ex  pura  benevolentia  manavit:  quia  periculum  erat,  ne  Rahab  suo  semet  indicio  proderet,  In  summa,  ostendunt  quanti  intersit,  rem  latere  quasi  sepultam  :  ne  mulier  pactum  inconsiderate  iactando,  sibi  mortem  accerseret.  Qua  in  re  ostendunt,  serio  eius  salutem  se  curare,  quando  mature  praeveniunt,  ne  sibi  eripiatur  beneficii  facultas.  Quod  distincte  etiam  praecipiunt,  ne  quis  domo  exeat,  seque  innoxios  fore  profitentur,  si  quis  in  publico  occisus  fuerit,  inde  utilem  doctrinam  colligere  licet,  sobrietatem  in  iuramentis  sedulo  colendam  esse,  ne  futiliter  quidlibet  promittendo  nomen  Dei  profanemus.  Consilium  Rahab,  ut  divertant  in  montem  illicque  triduo  quiescant,  ostendit  cum  fide  minime  pugnare  cautiones,  quae  manifestis  periculis  occurrunt.  Non  dubium  est,  quin  trepide  in  montem  obrepserint  nuncii  :  interea  tamen  fiducia,  quam  ex  notabili  Dei  auxilio  conceperant,  eorum  gressus  direxit  ne  quid  tumultuose  agerent.  Quaestio  rursus  a  quibusdam  movetur,  quum  crimen  sit  muros  transsilire,  an  licuerit  per  fenestram  urbe  egredi.  Verum  tenendum  est,  non  ubique  sanctos  fuisse  muros  urbium:  quia  non  ubique  fuerunt  Romuli,  qui  ad  fratres  necandos  praetextum  captarent.  Deinde  lex  illa  ut  Cicero  admonet,  aequitate  temperanda  est:  quia  praemio  quam  poena  dignior  est,  qui  repellendi  nostis  causa  murum  conscenderit.  Finis  legis  est,