8:442  hault.  C'est  certes  un  singulier  benefice  de  Dieu,  et  un  miracle  digne  de  memoire,  qu'entre  tant  de  revolutions  qui  se  font  aux  principaultez  du  monde,  il  entretient  son  Eglise  d'aage  en  aage,  et  [f.  73]  ne  permet  point  que  iamais  elle  soit  abolie.  Mais  pource  que  souventesfois,  cependant  que  les  incredules  regorgent  en  biens,  florissent  en  credit  et  authorite,  on  voit  la  povre  Eglise  estre  agitee  de  maulx  et  dangers  infinis:  qui  plus  est,  on  Ia  voit  comme  accablee,  tout  ainsi  qu'un  basteau  qui  seroit  prest  a  enfondrer:  la  felicite  d'icelle  consiste  principalement  en  l'estat  eternel  que  Dieu  luy  a  establi  en  son  Royaume.  La  circonstance  du  temps  auquel  ce  Pseaulme  a  este  compose  nous  servira  beaucoup  a  le  nous  faire  mieulx  entendre.  Car  combien  que  le  peuple  alors  fust  retourne  de  Babylone,  ou  il  avoit  este  tenu  long  temps  captif:  combien  que  l'Eglise  fust  recueillie  comme  en  un  corps,  pour  n'estre  plus  en  telle  dissipation  qu'elle  avoit  este:  combien  que  le  Temple  fust  basti  et  l'autel  dresse  pour  y  faire  les  sacrifices,  et  tout  le  service  de  Dieu  restaure:  neantmoins,  pource  qu'il  n'y  avoit  qu'une  poingnee  de  gens  qui  fust  retournee  en  la  Terre  saincte,  au  pris  de  la  grande  multitude  qui  en  estoit  sortie,  et  que  ce  qui  en  restoit  se  diminuoit  iournellement  par  les  violences  et  oultrages  des  ennemis,  tellement  que  l'estat  de  ce  peuple  estoit  fort  contemptible,  et  aussi  que  le  Temple  n'avoit  pas  une  telle  maieste  comme  au  paravant  :  tout  cela  faisoit  que  les  fideles  ne  pouvoyent  gueres  bien  esperer  pour  le  temps  advenir,  et  au  mieulx  aller,  il  sembloit  qu'il  fust  impossible  que  iamais  ils  fussent  restituez  en  l'estat  duquel  ils  estoyent  decheus.  Parquoy  il  y  avoit  danger  qu'en  reduisant  en  memoire  leur  desconficture  et  desfaicte,  et  pensant  aussi  a  tant  de  maulx  dont  ils  ne  cessoyent  d'estre  opprimez,  ils  ne  fussent  esbranlez,  et  qu'en  la  fin  ils  ne  tombassent  en  desespoir  pour  desfaillir  du  tout.  La  fin  doncques  du  Pseaulme  est  de  les  consoler,  a  fin  qu'ils  ne  se  descouragent  en  leurs  miseres:  et  pour  ce  faire,  Dieu  leur  promet  que