55:442  Deus  plerumque-  fallacem-  nominis  sui  praetextum  horrenda  excaecatione  in  hypocritis  punire  solet:  contra  autem  dona  sua  auget  iis  qui  pietatis  doctrinam  vere  et  ex  animo  amplexi  sunt.  Hortatur  ergo  ut  suam  vocationem  pie  vivendo  approbent.  Et  quo  plus  habeat  ponderis  haec  admonitio,  se  iam  morti  vicinum  indicat:  et  simul  excusat,  se  eadem  ideo  saepius  repetere,  ut  qui  se  mortuo  superstites  in  terra  manebunt,  altius  animis  infixa  habeant  quae  vivus  scripserit.  Quoniam  autem  totius  pietatis  fundamentum  est  evangelii  certitudo,  quam  indubia  sit  eius  veritas,  primum  ex  eo  demonstrat,  quod  ipse  omnium,  quae  illic  habentur,  oculatus  fuerit  testis:  ac  praesertim  quod  Christum  audierit  e  coelo  pronuntiari  Dei  filium:  deinde  quod  prophetarum  oraculis  Deus  illam  testatam  ao  comprobatam  esse  voluerit.  Simul  tamen  tam  a  falsis  doctoribus  qui  impia  figmenta  spargant,  quam  a  Dei  contemptoribus  qui  totam  religionem  subsannent,  periculum  instare  praedicit:  quo  fideles  ad  cavendum  instructi  sint  ac  muniti.  Yidetur  autem  hoc  consulto  dicere,  ne  sibi  tranquillum  et  aequabilem,  atque  ab  omni  certamine  remotum  doctrinae  cursum  sub  regno  Christi  promittant.  Postea,  quasi  in  tabula,  ingenium  moresque  eorum  depingit,  qui  suis  corruptelis  christianismum  inquinaturi  erant.  Porro  descriptio,  quam  prosequitur,  in  nostram  aetatem  maxime  competit:  sicuti  melius  patebit  ex  comparatione.  Stylum  enim  praecipue  stringit  in  Lucianicos  homines,  qui  ad  omnem  nequitiam  proiecti,  profanam  licentiam  ad  Dei  contemptum  inducunt:  imo  spem  futurae  vitae  penitus  ludibrio  habent:  qua  hominum  colluvie  mundum  videmus  passim  hodie  refertum.  Fideles  porro  hortatur,  non  modo  ut  suspensis  erectisque  animis  Christi  adventum  semper  exspectent:  sed  etiam  ut  diem  illum  quasi  praesentem  sibi  ante  oculos  statuant:  interea  vero  se  Domino  impollutos  custodiant.  In  qua  doctrina  Paulum  sibi  facit  socium  ac  suffragatorem  :  atque  ut  eius  scripta  ab  impiorum  calumniis  vindicet,  omnes,  qui  alio  ipsa  detorquent,  severe  damnat.