54:442  visons  aussi  de  nous  gouverner  tellement  devant  Dieu,  que  nous  monstrions  qu'il  y  a  une  vraye  sainctete  en  nous:  comme  de  faict  il  n'y  a  rien  plus  commun  en  toute  l'Escriture  saincte,  sinon  que  Dieu  pour  nous  separer  de  toutes  les  pollutions  de  ce  monde,  monstre  que  la  sainctete  emporte  cela,  que  nous  soyons  comme  nourris  en  sa  maison,  que  nous  soyons  comme  ses  domestiques,  tellement  que  son  sainct  Esprit  regne  en  nous.  Yoila  donc  en  somme  ce  que  nous  avons  a  observer.  Et  pourtant  regardons  de  plus  pres  a  nous  que  nous  n'avons  point  fait.  Quant  a  ce  que  S.  Paul  requiert  de  la  doctrine,  nous  en  traitterons  apres  disner,  au  plaisir  de  Dieu.  Mais  pour  le  present  qu'il  nous  suffise  de  retenir  qu'ici  sainct  Paul  nous  a  voulu  bailler  une  regle  qui  concerne  tous  fideles,  afin  que  personne  ne  s'en  cuide  exempter.  Or  il  reste  maintenant  de  scavoir  comme  nous  pourrons  parvenir  a  ces  vertus,  et  comme  nous  pourrons  donter  et  abolir  en  nous  les  vices  qui  sont  ici  condamnez.  Helas,  ce  ne  sera  point  de  nostre  francarbitre,  ne  de  nostre  habilite,  mais  il  faut  que  Dieu  y  besongne.  Et  comment?  Que  nous  soyons  des  membres  de  nostre  Seigneur  Iesus  Christ.  Il  est  dit  que  nous  devons  estre  iustes,  saincts,  sobres,  attrempez.  Et  comment  cela?  Quand  le  sainct  Esprit  dominera  en  nous,  alors  nous  aurons  des  vertus.  Il  est  dit  que  nous  devons  fuir  yvrongnerie,  intemperance,  noise,  debats,  fierte.  Et  comment?  Ayans  l'esprit  de  mansuetudo,  l'esprit  d'humilite,  l'esprit  de  crainte  de  Dieu,  l'esprit  de  prudence  et  de  discretion.  Or  tout  cela  a  este  donne  a  nostre  Seigneur  Iesus  Christ,  afin  qu'il  le  communique  a  ses  fideles.  D'autant  donc  que  de  nature  nous  sommes  pleins  de  vanite  et  de  mensonge,  pleins  d'ambition  et  d'orgueil,  addonnez  a  iniustice,  a  fraudes,  a  rapines:  d'autant  que  nous  laschons  la  bride  a  nos  appetis  desordonnez,  venons  nous  ranger  sous  le  chef  qui  a  este  establi,  cognoissons  qu'il  n'y  a  autre  moyen  d'estre  preservez  en  l'obeissance  de  Dieu,  et  de  vivre  selon  sa  volonte,  sinon  que  nous  soyons  unis  au  corps  de  nostre  Seigneur  Iesus  Christ.  Car  alors  son  sainct  Esprit  est  espandu  sur  nous,  qui  est  pour  nous  confermer  tant  mieux,  d'autant  que  c'est  la  source  de  toute  sainctete,  de  toute  iustice,  et  de  toute  perfection  en  somme.  Voila  donc  le  moyen  que  nous  avons  a  tenir,  et  par  lequel  il  nous  faut  parvenir  a  ce  que  sainct  Paul  nous  commande  en  ce  passage.  Et  c'est  la  cause  pourquoy  il  nous  est  monstre  iournellement  que  nous  sommes  appelez  a  la  communion  de  nostre  Seigneur  Iesus  Christ.  Car  quand  sainct  Paul  veut  definir  en  brief  la  fin  de  l'Evangile,  et  son  vray  usage,  il  dit  que  nous  sommes  appellez  pour  communiquer  a  nostre  Seigneur  Iesus,  pour  estre  unis  tellement  avec  luy,  que  nous  y  soyons  incorporee,