52:442  epistolae  ad  Colossenses:  quod  a  probabili  coniectura  non  abhorret.  Nam  quod  hunc  secundum  vocat  commilitonem,  in  ministros  id  quoque  peculiariter  competit.  Tametsi  enim  communis  est  omnibus  Christianis  militia  :  quia  tamen  in  ea  velut  signiferi  sunt  doctores,  ideo  prae  aliis  ad  bellandum  parati  esse  debent:  et  Satan  quoque  illis  ut  plurimum  infestior  est.  Ac  fieri  potest  ut  Archippus  quorundam  certaminum,  quae  sustinuit  Paulus,  socius  fuerit  ac  particeps,  et  certe  hac  voce  utitur  Paulus  quoties  de  persequutionibus  meminit.  Familiae  autem  Philemonis  summam  tribuit  laudem,  quum  domes  t  i  c  am  ecclesiam  nominat.  Neque  etiam  haec  parva  laus  patrisfamilias,  quod  ita  familiam  suam  instituit,  ut  sit  ecclesiae  imago,  et  pastoris  quoque  munus  intra  privatos  parietes  obeat.  Neque  etiam  omittendum  quod  uxor  similis  fuerit:  quia  non  abs  re  eam  Paulus  commendat.  4.  Gratias  ago.  Notandum  quod  pro  quo  gratias  agit,  pro  eodem  simul  precatur.  Nunquam  enim  tanta  est  vel  perfectissimis  gratulandi  materia,  quamdiu  in  hoc  mundo  vivunt,  quin  precibus  indigeant:  ut  det  illis  Deus  non  tantum  perseverare  usque  in  finem,  sed  in  dies  etiam  proficere.  Haec  autem  laus,  quam  Philemoni  tribuit,  breviter  complectitur  totam  christiani  hominis  perfectionem.  Ea  duabus  partibus  continetur,  fide  in  Christum,  et  caritate  erga  proximos.  Nam  huc  omnes  vitae  nostrae  actiones  omniaque  officia  referuntur.  Et  fides  in  Christum,  quia  in  eum  proprie  intuetur:  sicuti  neque  aliter  quam  per  eum  solum  cognosci  potest  Deus  pater,  neque  alibi  quam  in  eo  reperitur  quidquid  bonorum  quaerit  fides.  Caritatem  vero  non  ita  ad  sanctos  restringit,  quasi  erga  alios  nulla  esse  debeat.  Nam  quum  haec  sit  caritatis  doctrina,  carnem  nostram  non  despicere,  et  honore  prosequi  Dei  imaginem,  quae  naturae  nostrae  insculpta  est:  certe  totum  genus  humanum  comprehendit.  Sed  quoniam  arctiore  necessitudinis  vinculo  nobiscum  coniuncti  sunt  domestici  fidei,  et  eos  peculiariter  Deus  commendat,  ideo  iure  primas  obtinent.  Contextus  orationis  aliquantum  est  confusus:  sed  in  sensu  nihil  est  obscuritatis.  Nisi  quod  dubium  est  an  adverbium  sem-