37:442  silium  est  ad  sustinendos  eorum  insultus  armare  fideles  ac  munire,  ne  derisi  et  petulanter  vexati  labascant:  ac  si  diceret,  vobis  certamen  est  non  modo  cum  exteris  gentibus,  sed  cum  hostibus  domesticis,  qui  locum  in  ecclesia  occupant,  vobisque  propter  commune  Dei  foedus  fraterna  necessitudine  devincti  sunt.  Si  ut  fastuose  Deum  quoque  ipsum  despiciunt,  ludibrio  illis  est  vestra  simplicitas,  vobis  constanter  et  intrepide  repellenda  est  haec  tentatio.  Fratres  ergo  nominat,  qui  tamen  hostes  piorum  erant  ac  verbi  Dei:  nam  hoc  nomen,  quod  falso  usurpabant,  iis  per  concessionem  tribuit.  Unde  colligimus  non  esse  novum  hoc  malum:  hostes  qui  fratrum  nomen  gerunt  in  sinu  ecclesiae  foveri.  Bellum  hoc  intestinum  perpetuo  sustinendum  est  cum  hypocritis,  qui  aequo  animo  ferre  non  possunt  quod  recta  et  pura  conscientia  a  nobis  Deus  colatur.  {Reiicientes.)  Ad  verbum:  Iubentes  vos  procul  facessere:  quemadmodum  videmus  papam  adversus  nos  diris  fulminibus  agere,  quasi  in  sceleratos  et  perditos  :  ita  hypocritae  exiguum  piorum  numerum  reiiciebant.  Nam  quum  superiores  sunt  numero,  autoritate  et  opibus,  eam  quoque  tyrannidem  exercent,  ut  pro  sua  libidine  probent  atque  improbent  omnia,  et  efficiant  ut  pii  nullo  in  numero  habeantur,  quos  non  modo  multitudine  obruunt  ut  palea  triticum,  sed  fastu  etiam  conculcant.  {Glorificetur  dominus.)  Vel  in  futuro  tempore,  glorificabitur.  Alii  vertunt:  Gravis  est:  sed  videamus  quis  sensus  melius  conveniat.  Qui  transferunt  Gravis  est,  putant  impios  conqueri  de  nimia  Dei  severitate,  quod  non  parceret  populo  suo,  ac  severius  cum  ipso  ageret:  atque  hac  voce  sollicitatum  ad  desperationem  populum  fuisse  putant:  nam  quum  impii  nos  alienare  a  Deo  conantur,  tollunt  omnem  spem  ac  fiduciam  salutis.  Sed  ego  alterutram  ex  duabus  aliis  expositionem  potius  sequor.  Haec  quidem  magis  recepta  est:  Quoniam  impii  prophetias  ridebant  et  promissa,  quod  nusquam  ea  gloria  quam  assidue  inculcaverant  prophetae  appareret:  acsi  dicerent:  Exhibeat  Dominus  specimen  aliquod  suae  gloriae,  ut  tuto  in  ea  recumbamus:  velle  prophetam  armare  pios  adversus  talem  blasphemiam,  ne  fidem  suam  impiorum  sannis  labefactari  sinant.  Commode  tamen  et  forte  rectius  posset  ita  accipi  hic  locus,  impios  optima  quaeque  sibi  fuisse  pollicitos,  ac  si  suis  officiis  promeriti  fuissent  Dei  favorem,  sicuti  etiam  illis  exprobrat  Amos  (5,  18),  quod  secure  Deum  provocantes  confidant  sibi  propitium  fore.  Quum  ergo  freti  suis  piaculis  spernerent  omnes  minas,  Deumque  sibi  auxiliatorem  fore  iactarent,  respondet  longe  diverso  modo  visuros  Dei  gloriam.  Perinde  ac  si  diceret  Deum  effecturum  suo  adventu  ut  pii  intelligant  se  non  frustra  sperasse.  Apparebit  enim  piorum  bono,  et  exitio  eorum  qui  appariturum  ipsum  praedicant  impietatis