32:442  3.  {Laudate  eum  in  clangore.)  De  hebraicis  vocibus  quae  musica  instrumenta  significant,  non  laboro  :  tantum  meminerint  lectores,  hic  multas  species  referri  quorum  usus  viguit  sub  legali  cultu,  quo  melius  exprimat,  non  posse  minus  sedulo  satagere  Dei  filios  in  celebrandis  Dei  laudibus,  ac  si  iuberet  strenue  conferre  ad  hoc  pietatis  officium  quidquid  habent,  et  in  eo  penitus  occupari.  Neque  etiam  abs  re  Deus  sub  lege  olim  exegit  multiplices  illos  cantus,  ut  a  vanis,  imo  perversis  oblectamentis  quibus  nimis  cupide  dediti  sunt  homines,  ad  sanctam  utilemque  laetitiam  traducere  suorum  animos.  Exsultat  enim  mira  licentia  caro  nostra,  ut  etiam  portenta  quaedam  sibi  multi  excogitent  ad  sese  oblectandos,  interim  summa  illis  voluptas  est  Dei  memoriam  supprimere.  Haec  pravitas  non  aliter  corrigi  potuit  nisi  Deus  multis  fraenis  atque  assiduis  exercitiis  retineret  infirmum  et  rudem  populum.  Ideo  propheta  hortari  fideles  volens,  ut  totum  suum  gaudium  in  Dei  laudes  profundant,  coacervat  quaecunque  tunc  in  usu  erant  musica  instrumenta,  et  admonet  debere  omnia  consecrari  in  Dei  cultum.  6.  {Quidquid  sperat.)  Quia  vox  HUtW  halitum  vel  flatum  significat,  et  quidquid  est  animatum,  vel  spirat:  ideo  posset  extendi  sententia  haec  ad  omne  genus  animantium:  sicut  Psalmis  superioribus  vidimus,  creaturis  etiam  sensu  carentibus  attribui  praeconium  laudum  Dei.  Sed  quemadmodum  sub'  carnis  nomine  saepe  intelliguntur  soli  homines,  ita  etiam  minime  absurdum  erit,  sermonem  ad  homines  dirigi,  qui  tametsi  vitalem  spiritum  communem  habent  cum  brutis  animalibus,  prae  aliis  tamen  nomen  spirantium  sicut  viventium  obtinent.  Ut  ita  accipiam,  haec  me  ratio  movet:  hactenus  enim  populum  legalibus  caeremoniis  assuetum  hortatus  propheta  ad  canendas  Dei  laudes,  sese  ad  totum  humanum  genus  tandem  convertit:  venturum  tempus  tacite  ostendens,  quo  ubique  resonabunt  eadem  cantica  quae  tunc  non  nisi  in  Iudaea  audiebantur.  Atque  hoc  vaticinio  nos  in  eandem  symphoniam  Iudaeis  coniuncti  fuimus,  ut  assiduis  laudum  sacrificiis  colatur  Deus  inter  nos:  donec  collecti  in  regnum  coeleste  cum  electis  angelis  canamus  perpetuum  halleluiah.