8:441  EXPOSITION  SUR  LE  PSEAULME  LXXXVII.  L'ARGUMENT.  Nous  voyons  comme  les  enfans  du  monde,  quand  leur  cas  va  bien,  se  plaisent  en  leur  condition,  et  comme  ils  s'eslevent  bravement  en  mesprisant  l'Eglise  de  Dieu:  et  combien  mesmes  qu'ils  soyent  quelque  fois  domptez  par  afflictions,  si  ne  peuvent-ils  oublier  ceste  oultrecuidance  tant  fole,  de  se  plaire  aux  biens  caducques  de  la  terre.  Cependant  il  ne  leur  chault  gueres  de  la  religion  ne  du  service  de  Dieu,  pource  qu'en  se  contentans  de  leurs  delices,  richesses,  commoditez,  pompes  et  honneurs,  il  leur  semble  qu'ils  sont  heureux  sans  que  Dieu  leur  aide.  Or  il  advient  souventesfois  que  Dieu  traicte  telles  gens  selon  leurs  souhaits,  comme  s'il  les  vouloit  engraisser,  iusques  a  ce  que  le  temps  opportun  de  les  punir  soit  venu:  et  qu'a  l'opposite,  il  bat  son  Eglise  de  beaucoup  d'adversitez  et  la  traicte  fort  rudement:  ou  bien  la  laisse  languir  en  povre  condition  et  miserable,  tellement  qu'elle  pourroit  s'estimer  malheureuse.  Pour  le  moins,  elle  est  subiecte  a  la  mocquerie  et  opprobres  des  mondains.  A  fin  doncques  que  les  fideles  ne  soyent  trompez  d'une  telle  apparence,  il  leur  est  besoing  d'estre  ramenez  a  un  autre  regard  plus  hault,  a  fin  qu'ils  se  puissent  tenir  resolus  de  ce  qui  est  dict  au  Pseaulme  33,  v.  12,  a  scavoir:  Qu'un  peuple  est  bien-heureux,  moyennant  qu'il  ait  le  Seigneur  pour  son  Dieu.  Et  c'est  le  sommaire  du  Pseaulme  present,  de  monstrer  qu'il  n'y  a  que  la  seule  Eglise  de  Dieu  qui  surmonte  en  dignite  et  excellence  tous  les  royaumes  et  gouvernemens  de  la  terre,  pource  qu'elle  ha  Dieu  pour  son  tuteur  et  gardien  de  son  salut,  et  qu'elle  est  soubs  sa  main  et  conduicte,  voire  a  fin  qu'entre  les  horribles  tempestes,  troubles  et  changemens  dont  le  monde  est  continuellement  esbranle,  elle  demeure  et  persiste:  et  principalement,  qu'estant  ainsi  miraculeusement  sauvee  par  la  grace  de  Dieu,  elle  poursuyve  a  batailler  vaillamment  iusques  a  ce  qu'elle  soit  parvenue  a  la  couronne  de  gloire  qui  luy  est  apprestee  la