25:441  441  COMMENTARIUS  IN  IOSUE  CAP.  II.  442  quin  ab  officio  deflectat.  Vafrities  ergo  opus  per  se  laudabile  aliquatenus  contaminat.  Neque  tamen  particulare  vitium  gratiam  prorsus  abrogat  sancto  eius  studio  :  quia  Dei  indulgentia  sepelitur,  ne  in  rationem  veniat.  Perperam  quoque  Rahab,  dum  nuncios  abiisse  mentitur:  praecipua  tamen  actio  Deo  grata,  quia  vitium  virtuti  admistum  non  imputatur.  Interea  sicuti  voluit  Deus  liberari  speculatores,  ita  mendacio  protegi  eorum  vitam  non  probavit.  7.  Viri  persequuti  sunt.  Tanta  credulitas  ostendit  fuisse  a  Deo  infatuatos.  Etsi  autem  ipsis  delusis  multum  profecerat  Rahab:  nova  tamen  iniicitur  anxietas,  quia  portis  occlusis  urbs  instar  carceris  spem  exitus  adimebat.  Serio  itaque  examine  rursus  fuerunt  experrecti  ad  Deum  invocandum.  Nam  quum  ex  eorum  relatu  scripta  fuerit  haec  historia,  quid  tunc  ageretur  minime  eos  latuit  :  praesertim  quum  amplificandae  gratiae  suae  causa  Deus  eos  consulto  obiecerit  aliis  atque  aliis  discriminibus.  Et  iam  quum  edocti  fuissent  se  quaeri,  ubi  refertur  fuisse  pervigiles,  sollicitos  ac  perplexos  fuisse  colligimus.  Trepidationem  vero  non  parum  auxit,  quod  narratum  est,  ab  exitu  prohiberi.  Apparet  tamen  Rahab  nullo  modo  fuisse  exterritam,  quando  praesenti  animo  et  sedatis  verbis  de  sua  et  familiae  incolumitate  paciscitur.  Atque  in  hac  constantia  relucet  quae  alibi  commendatur  eius  fides:  quia  humanitus  nunquam  contempto  regis  et  populi  furore,  semimortuis  hospitibus  supplicasset.  Ridiculum  quidem  multis  videtur  elogium  quo  eam  insigniunt  tam  Iacobus  quam  autor  epistolae  ad  Hebraeos,  dum  eam  recensent  in  catalogo  fidelium.  Verum  quisquis  circumstantias  omnes  prudenter  expendet,  facile  iudicabit  praeditam  fuisse  viva  fide.  Primo  si  a  fructibus  arbor  cognoscitur,  hic  effectus  fidei  cernimus  non  vulgares  qui  totidem  sunt  eius  testimonia.  Deinde  ex  semine  pietatis  haec  sententia  prodiit,  iam  quodammodo  victas  esse  et  prostratas  gentes  vicinas,  quia  terrore  divinitus  immisso  perculsi  sunt  omnium  animi.  Occurrunt  eiusmodi  voces  in  profanis  quoque  scriptoribus:  quas  Deus,  ut  sibi  regendis  et  flectendis  quocunque  voluerit  hominum  cordibus  imperium  vendicaret,  expressit.  Verum  quod  illi  quasi  psittaci  garriunt,  Rahab  ex  sincero  affectu  pronuncians  Deum  terram  destinasse  filiis  Israel,  quia  omnes  incolae  defluxerint  coram  ipsis,  imperium  Deo  vendicat  in  hominum  corda,  quod  ei  mundi  superbia  abrogat.  Etsi  enim  omnium  temporum  experientia  docuit,  plures  exercitus  caesos  fuisse  vel  profligatos  subito  et  inopinato  pavore,  quam  vi  et  impressione  hostium:  mox  tamen  evanuit  illa  cognitio.  Hinc  factum  est,  ut  suam  fortitudinem  semper  extulerint  victores,  et  ex  prospero  successu  gloriati  sint,  se  bellicosos  ac  strenuos  fuisse.  Senserunt  fateor,  interdum  aliunde  vel  conferri  vel  eripi  pugnandi  audaciam  et  ani-