8:440  n'estre  pas  traictez  de  Dieu  comme  ils  desirent,  ou  se  repentent  d'avoir  bien  commence,  monstrent  bien  qu'ils  n'ont  pas  suyvi  le  conseil  de  nostre  Seigneur  Iesus,  qui  est  de  bien  compter,  quand  on  commence  un  bastiment,  ce  qu'il  pourra  couster  a.  le  parfaire,  a  fin  qu'on  ne  se  fasche  point  d'y  avoir  trop  despendu,  et  que  par  ce  moyen  l'ouvrage  demeure  imparfaict.  Qui  pis  est,  la  plus  part  de  ceulx  qui  se  lassent  ainsi  au  milieu  [f.  71]  du  chemin,  le  font  sans  propos.  En  quoy  ils  se  monstrent  trop  impudens.  Car  ceulx  qui  n'avoyent  maisons  ne  champs,  et  ausquels  c'estoit  tout  un  d'habiter  en  leur  pais  ou  au  bout  du  monde,  n'auront  point  de  honte  de  reprocher  a  Dieu  qu'ils  ont  quiete  ceci  ou  cela.  Mais  encores  prenons  le  cas  qu'ils  ayent  perdu  de  leur  bien  pour  l'Evangile,  toutesfois  c'est  une  mocquerie  de  priser  un  sols  plus  qu'un  escu.  Cependant,  on  n'oira  autre  chose  que  ces  murmures:  et  pleust  a  Dieu  que  telles  gens  fassent  bien  a  leur  aise  fort  loing  de  nous!  Tant  y  a  que  ni  povres  ni  riches  n'ont  iuste  excuse  de  se  desbaucher  pour  les  afflictions  qui  leur  adviennent  en  suyvant  Dieu.  Or,  pource  que  cela  nous  est  bien  difficile,  le  remede  nous  est  monstre  au  Pseaulme  84  (v.  6),  la  ou  David,  apres  avoir  dit:  Bien-heureux  est  l'homme  qui  espere  en  Dieu,  adiouste:  et  au  cueur  duquel  sont  les  sentiers.  Comme  s'il  disoit,  qui  ha  son  cueur  addonne  a  cheminer  selon  que  Dieu  le  commande.  Voyla  donc  deux  choses  qui  ne  se  doibvent  point  separer  l'une  de  l'autre:  de  mettre  nostre  esperance  en  Dieu,  et  d'aller  le  droict  chemin.  Parquoy,  selon  que  nostre  fragilite  nous  empesche  de  marcher  en  avant,  ou  mesme  qu'elle  nous  rend  si  lasches  que  nous  serions  tous  les  coups  contens  de  tourner  bride,  fortifions-nous  en  foy  et  en  esperance,  prians  nostre  bon  Dieu  qu'il  nous  face  tellement  regarder  a  luy,  que  rien  ne  nous  trouble  quand  nous  serons  fondez  en  ses  promesses,  par  lesquelles  il  nous  asseure  d'estre  avec  nous,  et  en  la  vie  et  en  la  mort.