32:440  mansuetudine  affine  habet?  Sed  ubi  Deus  ipse  vindictae  est  autor,  rectum  iudicium  est,  non  crudelitas.  Itaque  quum  hic  fit  mentio  iudicii  scripti,  admonet  propheta  Iudaeos  Dei  mandato  fuisse  armatos  ad  libertatem,  qua  iniuste  ab  exteris  et  tyrannis  privati  erant,  vindicandam,  atque  ita  non  posse  culpari,  quod  exsequuti  sint  indicium  scriptum.  Frigide  enim  exponitur  hic  locus  ubi  non  tenetur  hoc  prophetae  consilium,  quod  scilicet  Iudaeos  ad  praeceptum  Dei  revocet,  ne  quid  suscipiant  propria  libidine,  fraenumque  iniiciat  ad  cohibendum  eorum  fervorem  :  ac  si  diceret,  non  aliam  permitti  vindictam  filiis  Dei,  nisi  quae  vocationi  respondeat:  quia  ubi  quisque  proprio  impetu  fertur,  nullus  est  moderationi  locus.  Obiici  etiam  posset  alia  quaestio:  nam  sicuti  Christus,  Matth.  12,  20  venisse  dicitur  sine  clamore  et  strepitu,  ut  calamum  quassatum  non  confringat:  ita  eandem  suis  personam  imponit.  Solutio  tamen  facilis  est,  Christum  simul  ferreo  sceptro  armari,  quo  rebelles  omnes  conterat  :  et  Iesa.  63,  2  describi  sanguinolentum,  qui  caesis  passim  hostibus,  caedendo  tamen  non  fatigetur.  Nec  vero  mirum  est,  quum  totus  mundus  plenus  sit  contumacia,  clementiam,  quae  indigne  respuitur,  in  severitatem  converti.  Iam  doctrina  haec  sic  in  usum  nostrum  probe  accommodari  poterit,  quod  de  gladio  ancipiti  dicitur,  peculiariter  competere  in  Iudaeos,  nobis  proprie  non  aptari,  quibus  idem  iuris  hodie  permissum  non  est,  nisi  quod  principes  et  magistratus  gladio  etiam  divinitus  sunt  instructi  ad  puniendam  omnem  violentiam  :  sed  specialis  est  vocatio.  Quantum  ad  totum  ecclesiae  corpus  spectat,  alius  nunc  gladius  nobis  datur  in  manum,  verbi  scilicet,  ac  spiritus,  quo  mactemus  Deo  in  sacrificium  qui  prius  fuerant  hostes:  vel  etiam  quo  eos  tradamus  in  aeternum  exitium  nisi  resipiscant.  Nam  quod  de  Christo  vaticinatur  Iesaias  cap.  11,  4  ad  omnia  eius  membra  patet,  Conficiet  impium  verbo  oris  sui,  et  spiritu  labiorum  suorum  interficiet.  Si  inter  has  vocationis  suae  metas  placide  se  contineant  fideles,  sentient  tandem  non  frustra  promissam  illis  esse  vindictam  de  hostibus.  Deus  enim  (ut  nuper  dixi)  ad  iudicium  scriptum  nos  revocans,  tam  animos  nostros  quam  manus  coercet,  ne  plus  audeamus  quam  ipse  praecipit.  In  fine  versus  decorem  hunc  omnibus  Dei  mansuetis  fore  dicens,  non  solum  nos  hortatur  ad  pietatis  studium,  sed  etiam  solatium  adhibet,  ne  putemus  iacturae  fore  nostram  mansuetudinem  ac  patientiam,  sicuti  maior  pars  ideo  ad  ferociam  ebullit,  quia  non  putat  se  vitam  suam  posse  aliter  tueri,  quam  ululando  cum  lupis.  Ergo  quamvis  fideles  neque  robusti  sint  instar  gigantum,  nec  digitum  movere  audeant  sine  Dei  iussu,  animis  etiam  placidi  sint,  decorum  tamen  ac  splendidum  exitum  omnibus  eorum  miseriis  fore  propheta  docet.