58:44  tant  que  ie  voudray  :  car  Dieu  me  saura  bien  garder,  et  ie  ne  pourray  iamais  perir,  et  au  contraire,  si  ie  suis  reprouve,  et  que  faut-il  que  ie  me  tormente  tant  a  bien  faire,  veu  que  ie  ne  pourray  iamais  estre  sauve?  Ceux-la  donc  (comme  i'ai  dit)  ne  vienent  point  desgorger  leurs  contradictions,  pour  renverser  la  verite  de  Dieu:  mais  ils  s'assoupissent  la,  et  demeurent  en  leurs  pechez  comm��  gens  abrutis.  Or  il  nous  faut  garder  et  de  l'un  et  de  l'autre.  Et  pourtant  (comme  i'ai  dit)  le  Prophete  Malachie  remonstrant  au  peuple  que  tout  ce  qu'il  avoit  lui  venoit  de  la  pure  et  gratuite  bonte  de  Dieu,  il  les  exhorte  a  sainctete  de  vie.  Et  pourtant,  toutesfois  et  quantes  qu'il  nous  est  parle  que  Dieu  est  autheur  de  nostre  salut,  et  que  nous  n'y  pouvons  rien  apporter,  et  qu'encore  il  faut  que  nous  soions  tousiours  conservez  sous  sa  garde,  et  qu'il  parface  et  accomplisse  ce  qu'il  a  commence,  que  cela  ne  soit  point  pour  nous  faire  lascher  la  bride  a  nos  vices  :  mais  plustost  pour  nous  retenir  en  sa  crainte.  Et  de  fait  aussi,  quand  saint  Paul  dit  que  ce  sont  lettres  cachetees,  et  que  c'est  un  secret  incomprehensible  que  de  savoir  quels  sont  les  enfans  de  Dieu,  il  adiouste,  Quiconque  invoque  le  Nom  de  Dieu,  qu'il  se  departe  de  toute  iniquite.  Notons  donc  que  Dieu  ne  nous  a  point  voulu  donner  occasion  de  mal-faire,  quand  il  nous  a  eleus  sans  aucun  regard  de  nos  merites,  et  qu'il  nous  maintient  aussi  par  sa  pure  bonte:  mais  que  c'est  afin  que  nous  l'honorions,  et  que  nous  cheminions  en  tant  plus  grande  solicitude.  Et  pourtant,  revenons  a  ce  qui  a  este  touche:  c'est  assavoir,  qu'il  nous  a  eleus,  afin  que  nous  soyons  saints  et  irreprehensibles  devant  sa  face.  Il  est  vray  qu'il  ne  nous  a  point  eleus  d'autant  qu'il  nous  trouvast  tels:  mais  quand  il  nous  a  eleus,  c'a  este  a  ceste  fin-ia.  Il  faut  donc  que  nous  y  tendions,  et  que  ce  soit  le  but  auquel  nous  aions  nostre  adresse  tout  le  temps  de  nostre  vie.  Or  nous-nous  prosternerons  devant  la  Maieste  de  nostre  bon  Dieu  en  cognoissance  de  nos  fautes,  le  priant  qu'il  nous  les  face  tellement  sentir,  que  ce  soit  pour  nous  humilier,  et  pour  nous  attirer  a  une  vraye  repentance,  a  ce  que  nous  renoncions  a  toutes  nos  cupiditez  et  affections  charnelles,  et  qu'estans  ainsi  aneantis  en  nous  mesmes,  nous  soyons  esclairez  par  la  vertu  de  son  S.  Esprit,  afin  de  le  servir  et  honorer  tout  le  temps  de  nostre  vie,  et  que  par  ce  moien  nous  soions  tant  plus  incitez  a  nous  adonner  du  tout  a  lui,  cognoissant  que  nous  tenons  tout  de  sa  pure  bonte:  et  que  ce  soit  pour  glorifier  son  sainct  Nom,  non  seulement  de  bouche,  mais  en  toute  nostre  vie.  Que  non  seulement,  etc.