47:44  et  minime  vulgare  exspectarent:  simul  commonefieri  decuit  de  vitiato  et  perverso  cultu  Dei,  ne  emendationem  respuerent.  M  fratres  eius.  Cur  fratres  se  Christo  comites  adiunxerint,  incertum  est,  nisi  forte  simul  ituri  erant  Hierosolymam.  Caeterum  fratrum  nomine  quoslibet  cognatos  hebraica  lingua  designari  notum  est.  13.  Erat  in  propinquo  pascha,  itaque  venit.  Ad  verbum  graece  habetur,  Et  venit:  sed  evangelista  copulam  posuit  loco  rationalis  particulae.  Venisse  enim  tunc  significat,  ut  pascha  celebraret  Hierosolymae.  Huius  autem  consilii  duplex  erat  finis.  Nam  quum  nostra  causa  legi  subiectus  esset  filius  Dei,  omnia  legis  mandata  exacte  servando,  plenae  subiectionis  et  obedientiae  typum  in  sua  persona  exhibere  voluit.  Deinde,  quoniam  in  populi  frequentia  magis  prodesse  poterat,  hac  fere  occasione  semper  usus  est.  Ergo  quoties  postea  dicetur,  venisse  Christum  diebus  festis  Hierosolymam,  hoc  ideo  ab  ipso  factum  observent  lectores,  primum  ut  a  Deo  instituta  pietatis  exercitia  cum  reliquis  coleret:  deinde  ut  in  maiore  populi  confluxu  publicaret  suam  doctrinam.  16.  Ne  faciatis  domum  patris  mei.  In  secunda  eiectione  gravius  ac  severius  loquutum  commemorant  alii  evangelistae:  quod  scilicet  ex  templo  Dei  facerent  speluncam  latronum.  Atque  ita  agendum  est,  ubi  mitior  castigatio  profectu  caruit.  Nunc  simpliciter  admonet,  ne  templum  Dei  in  alienos  usus  vertendo  profanent.  Templum  Dei  domus  vocabatur,  quod  illic  Deus  peculiariter  invocari  vellet,  quod  virtutem  illic  suam  exsereret,  quod  denique  ad  spirituales  et  sacros  ritus  illud  destinasset.  At  se  quidem  Dei  filium  pronuntiat  Christus,  ut  sibi  ius  et  autoritatem  repurgandi  templi  vindicet.  Porro  quia  facti  sui  rationem  hic  reddit  Christus,  si  quem  inde  fructum  colligere  libet,  in  hac  praecipue  sententia  insistere  convenit.  Cur  ergo  ementes  et  vendentes  eiicit  ex  templo?  Ut  cultum  Dei  hominum  vitio  adulteratum  suae  integritati  restituat,  atque  hoc  modo  templi  sanctitatem  instauret  ac  asserat.  Scimus  autem  exstructum  fuisse  templum  illud  ut  eorum  umbra  esset,  quorum  viva  effigies  exstat  in  Christo.  Itaque  ut  sacrum  Deo  maneret,  nonnisi  ad  spirituales  usus  applicandum  erat.  Hac  de  causa  fas  esse  negat  in  emporium  converti.  Principium  enim  sumit  ex  Dei  instituto,  quod  semper  nobis  tenendum  est.  Quibuscunque  ergo  praestigiis  ludat  Satan,  quidquid  a  Dei  mandato  vel  tantillum  deflectit,  sciamus  perversum  esse.  Speciosus  ad  fallendum  erat  ille  fucus,  iuvari  et  provehi  Dei  cultum,  quum  ad  manum  fidelibus  porrigebantur  quae  offerrent:  sed  quia  Deus  in  alios  usus  templum  suum  destinaverat,  nihil  moratur  Christus,  quae  adversus  ordinem  a  Deo  positum