45:44  Nec  vero  dubium  est,  quin  maior  ad  extraordinarium  partum  concursus  hominum  factus  sit.  Portenti  loco  habuerant  vetulam  et  sterilem  repente  videre  gravidam:  nunc,  ubi  natus  est  puer,  renovatur  et  augetur  admiratio.  Colligimus  ex  Lucae  verbis,  quamvis  domi  circumciderent  suos  infantes,  non  tamen  id  facere  solitos  sine  hominum  frequentia  et  conventu:  idque  merito.  Nam  quum  esset  commune  ecclesiae  sacramentum,  non  debuit  clam  vel  privatim  administrari.  59.  Vocabant  eum  patris  nomine.  Scimus,  initio  imposita  fuisse  hominibus  nomina,  vel  ex  rerum  eventu,  vel  etiam  prophetico  instinctu,  ad  notandum  aliquod  arcanum  Dei  opus:  sed  postea  longo  temporis  successu,  quum  uberior  esset  nominum  copia  quam  ut  nova  quotidie  fingi  commode  possent,  contenti  vetustis  nominibus  et  iam  receptis  maiorum  nomine  posteros  vocarunt.  Sic  ante  patrem  Ioannis  plures  fuerant  Zachariae,  et  forte  hic  ex  filio  Barachiae  originem  traxerat.  Scimus  autem,  ut  plurimum  quod  usu  et  consuetudine  receptum  est  pro  lege  haberi.  Ideo  contendunt  isti  homines,  morem  qui  invaluerat  servandum  esse  in  nomine  infantis.  Caeterum  ut  nulla  in  nominibus  statuenda  est  religio,  ita  pie  et  utiliter  delectum  a  fidelibus  hac  in  parte  haberi,  nemo  sanus  negabit:  ut  scilicet  nomina  imponant  filiis  suis,  quae  doctrinae  admonitionis  vice  illis  sint,  deinde  potius  mutuentur  ex  sanctis  patribus  (ut  filios  suos  ad  illorum  imitationem  provocent)  quam  arcessant  a  profanis.  60.  Respondens  mater  eius.  Incertum  est,  ao  oraculo  etiam  edocta  fuerit  Elisabeth.  Quanquam  verisimile  est,  quum  videret  Zacharias  se  nimiae  in  credendo  tarditatis  poenam  luere,  uxori  fuisse  testatum  per  scripturam,  quod  de  nomine  angelus  praeceperat:  alioqui  non  paruisset  Dei  mandato.  Porro  cur  nomen  hoc  baptistae  divinitus  inditum  fuerit,  supra  exposui.  Cognati,  quamvis  rationem  non  teneant,  moventur  tamen  rei  novitate,  praesertim  quia  non  temere  hoc  fieri  coniiciunt.  64.  Apertum  est  os  eius.  Deus  natalem  prophetae  sui  restituta  patri  lingua  nobilitat:  neque  enim  dubium  est,  quin  beneficium  hoc  eo  fine  et  consilio  in  diem  illum  distulerit,  ut  hominum  oculos  in  Ioannem  converteret.  Dicitur  Zacharias  laudasse  Deum,  non  modo  testandae  gratitudinis  causa,  sed  ut  cognati  et  vicini  poenam  illi  inflictam  esse  scirent,  quia  ad  credendum  nimis  tardus  fuerat.  Neque  enim  ipsum  puduit  cum  suo  dedecore  celebrare  Dei  gloriam.  Ita  passim  omnibus  innotuit,  non  fortuito  aut  vulgari  more  genitum  fuisse  infantem,  sed  coelesti  oraculo  promissum.  65.  Et  accidit  timor  super  omnes.  Timor  hic,  cuius  meminit  Lucas,  ex  sensu  divinae  potentiae  manavit:  sic  enim  reverenter  consideranda  sunt  Dei  opera,  ut  serio  nos  afficiant.  Nec  vero  Deus