35:44  doctrine  imprimee  en  nous,  et  qu'elle  ait  prins  sa  racine  la  dedans,  et  puis  que  la  bouche  rende  tesmoignage  de  ce  que  nous  saurons:  bref,  il  faut  que  nous  ayons  este  enseignez  de  Dieu,  devant  que  nous  puissions  estre  maistres  ne  docteurs:  et  mesmes  quand  nous  preschons,  que  ce  ne  soit  pas  seulement  pour  les  autres,  mais  que  nous  soyons  comprins  au  nombre  et  en  la  compagnie.  Voila,  di-ie,  ce  que  nous  avons  a  observer.  Et  defait,  un  homme  qui  parlera  sans  avoir  senti  la  vertu  de  la  parole  de  Dieu  en  soi,  que  fait-il  sinon  qu'il  ioue  une  farce?  Et  quel  sacrilege  est  cela?  Quelle  pollution  de  la  parole  de  Dieu?  Ainsi  donc  pensons  diligemment  a  nous:  et  toutes  fois  et  quantes  que  nous  montons  en  chaire,  que  nous  ayons  bien  premedite  ceste  lecon  qui  nous  est  ici  donnee,  c'est  assavoir,  Que  la  droiture  de  nostre  coeur  se  monstre  en  la  langue.  Et  cependant  aussi,  quand  nous  verrons  une  doctrine  estre  droite,  et  que  l'homme  qui  parle,  tasche  a  nous  edifier:  sachons  que  nous  sommes  ingrats  a  Dieu,  et  du  tout  rebelles,  si  nous  n'oyons  en  toute  humilite  ce  qu'il  nous  propose.  Or  quand  Eliu  use  d'une  telle  preface,  il  ne  parle  point  humainement:  mais  il  monstre  comme  Dieu  nous  veut  retenir  a  soy.  Et  par  quel  moyen?  Me  voici,  dit-il,  escoute  moi:  car  il  n'y  a  que  droiture  en  mes  propos.  C'est  autant  comme  s'il  mettoit  une  regle  au  nom  de  Dieu,  Que  si  une  doctrine  qui  est  mise  en  avant,  est  saincte,  et  que  nous  en  soyons  convaincus:  si  nous  ne  sommes  humiliez  en  toute  crainte  pour  nous  y  renger,  nous  ne  serons  point  coulpables  d'avoir  resiste  a  l'homme  qui  parloit  a  nous:  mais  c'est  autant  comme  si  nous  despitions  le  Dieu  vivant.  Et  ainsi  donc,  que  chacun  soit  attentif  quand  la  parole  de  Dieu  se  presche:  et  que  puis  qu'il  nous  fait  la  grace  de  nous  susciter  des  hommes,  par  lesquels  il  nous  declare  privement  sa  volonte:  que  nous  ne  luy  soyons  point  sauvages,  mais  rendons  nous  dociles  a  ce  que  nous  cognoissons  estre  procede  de  luy.  Et  d'autant  que  la  Loy,  et  les  Prophetes,  et  l'Evangile  nous  ont  este  apportez  par  ceux  dont  la  droiture  nous  est  assez  cognue  et  testifiee,  notons  que  quiconque  ne  s'assuiettira  a  ceste  doctrine,  il  ne  luy  faut  point  d'autre  procez  pour  sa  condamnation.  En  somme  notons  que  nostre  Seigneur  a  autorise  ses  Prophetes  et  Apostres,  a  fin  que  la  doctrine  qu'ils  nous  ont  donnee  ne  soit  plus  en  doute,  mais  que  nous  la  tenions  comme  un  arrest  irrevocable.  Voila  donc  pour  un  Item.  Or  cependant  nous  sommes  advertis,  qu'il  ne  faut  pas  que  les  fideles  s'abbrutissent  a  leur  escient  pour  recevoir  tout  ce  qu'on  leur  dira:  mais  qu'ils  doivent  examiner  la  doctrine,  si  elle  est  de  Dieu  ou  non.  Et  voila  pourquoy  il  est  dit,  qu'on  esprouve  les  esprits.  Et  ceci  est  bien  a  noter:  car  nous  voyons