2:44  [CO  2.44]  quae  illis  rerum  omnium  est  artifex,  Deum  subducunt.  Vident  tam  exquisitum  artificium  in  singulis  suis  membris  ab  ore  et  oculis  usque  ad  infimos  unguiculos.  Hic  quoque  naturam  substituunt  in  locum  Dei.  Sed  in  primis  tam  agiles  animae  motus,  tam  praeclarae  facultates,  tam  rarae  dotes  divinitatem  prae  se  ferunt,  quae  se  non  patitur  facile  celari:  nisi  Epicurei  tanquam  Cyclopes,  ex  hac  altitudine  bellum  Deo  protervius  inferrent.  Itane  vero  ad  regendum  quinque  pedum  vermiculum  toti  coelestis  sapientiae  thesauri  concurrunt?  universitas  mundi  hac  praerogativa  carebit?  Primo  statuere  aliquid  organicum  in  anima  quod  singulis  partibus  respondeat,  adeo  nihil  ad  obscurandam  Dei  gloriam  facit,  ut  potius  eam  illustret.  Respondeat  Epicurus,  quis  atomorum  concursus  cibum  et  potum  coquens,  partem  in  excrementa,  partem  in  sanguinem  digerat,  ac  efficiat  ut  singulis  membris  tanta  sit  industria  ad  praestandum  officium  ac  si  totidem  animae  communi  consilio  corpus  unum  regerent?  [Inst  1.5.5.]  Sed  mihi  nunc  cum  illa  porcorum  hara  negotium  non  est:  eos  magis  compello  qui  praeposteris  argutiis  dediti,  frigidum  illud  Aristotelis  dictum  libenter  obliquo  flexu  traherent  tam  ad  immortalitatem  animae  abolendam,  quam  ad  eripiendum  Deo  ius  suum.  Nam  quia  organicae  sunt  animae  facultates,  hoc  praetextu  alligant  eam  corpori,  ut  sine  eo  non  subsistat;  naturae  vero  elogiis,  quantum  in  se  est,  Dei  nomen  supprimunt.  Atqui  longe  abest  quin  potentiae  animae  in  functionibus  quae  corpori  serviunt  inclusae  sint.  Quid  hoc  ad  corpus  ut  coelum  metiaris,  numerum  stellarum  colligas,  teneas  cuiusque  magnitudinem,  scias  quo  spatio  inter  se  distent,  qua  celeritate  vel  tarditate  conficiant  suos  cursus,  quot  gradibus  huc  vel  illuc  deflectant?  Fateor  quidem  esse  aliquem  astrologiae  usum;  sed  tantum  ostendo,  in  hac  tam  alta  disquisitione  rerum  coelestium  non  esse  organicam  symmetriam,  sed  suas  animae  esse  partes  a  corpore  separatas.  Exemplum  unum  proposui,  ex  quo  reliqua  sumere,  lectoribus  promptum  erit.  Multiplex  sane  animae  agilitas  qua  coelum  et  terram  perlustrat,  praeterita  futuris  coniungit,  retinet  memoriter  quae  pridem  audivit,  imo  quidlibet  sibi  figurat;  solertia  etiam  qua  res  incredibiles  excogitat,  ei  quae  tot  mirabilium  artium  mater  est,  certa  sunt  divinitatis  insignia  in  homine.  Quid  quod  dormiendo  non  tantum  se  circumagit  et  versat,  sed  multa  utilia  concipit,  de  multis  ratiocinatur,  futura  etiam  divinat?  Quid  hic  dicendum  est,  nisi  deleri  non  posse  quae  in  homine  impressa  sunt  immortalitatis  signa?  Nunc  quae  ratio  feret  ut  sit  homo  divinus,  et  creatorem  non  agnoscat?  Nos  scilicet,  iudicio  quod  nobis  inditum  est,  discernemus  inter  iustum  et  iniustum,  nullus  autem  erit  in  coelo  iudex?  Nobis  etiam  in  somno  manebit  aliquid  residuum  intelligentiae,  nullus  Deus  excubias  aget  in  mundo  regendo?  Tot  artium  rerumque  utilium  inventores  censebimur,  ut  fraudetur  Deus  sua  laude?  quum