47:439  439  IN  EVANGELIUM  IOANNIS  440  communicat  cum  suis  discipulis,  sed  tanquam  suum  largitur,  nempe  quem  habet  cum  patre  communem.  Quare  divinitatis  gloriam  sibi  usurpant,  quicunque  spiritum  se  flatu  dare  profitentur.  Iam  vero  notandum  est,  quos  ad  munus  pastorale  vocat  Christus  necessariis  etiam  donis  ornare,  ut  pares  sint  exsequendo  muneri,  vel  saltem  non  inanes  nudique  accedant.  Quod  si  verum  est,  nullo  negotio  refellitur  stulta  papistarum  iactantia,  qui  dum  suam  hierarchiam  magnificis  praeconiis  extollunt,  ne  minimam  quidem  scintillam  spiritus  sancti  possunt  in  suis  episcopis  ostendere.  Volunt  ut  legitimos  credamus  esse  ecclesiae  pastores  adeoque  apostolos  et  vicarios  Christi,  quos  apparet  omni  spiritus  gratia  prorsus  esse  vacuos.  Atqui  hic  nobis  certa  regula  praescribitur  aestimandae  eorum  vocationis,  qui  ecclesiae  Dei  praesunt,  si  videmus  spiritu  sancto  donatos.  Praecipue  tamen  voluit  Christus  ordinis  apostolici  dignitatem  asserere.  Aequum  enim  erat  ut  singularis  esset  eorum  autoritas,  qui  primi  et  praecipui  ad  praedicandum  evangelium  electi  erant.  Verum  si  tunc  flatu  spiritum  Christus  contulit  apostolis,  videtur  supervacua  fuisse  spiritus  sancti  missio,  quae  postea  sequuta  est.  .Respondeo,  sic  datum  fuisse  apostolis  spiritum  hoc  loco,  ut  adspersi  duntaxat  fuerint  eius  gratia,  non  autem  plena  virtute  imbuti.  Nam  quum  apparuit  in  linguis  igneis  spiritus  super  eos,  prorsus  fuerunt  renovati.  Et  sane  non  ita  eos  nunc  constituit  evangelii  sui  praecones,  ut  statim  ad  opus  emittat,  sed  potius,  ut  alibi  habetur,  quiescere  eos  iussit  (Luc.  24,  49).  Et  si  rite  omnia  expendimus,  non  tam  in  praesentia  necessariis  eos  dotibus  instruit,  quam  in  futurum  tempus  spiritus  sui  organa  destinat.  Quare  hic  flatus  ad  magnificam  illam  spiritus  missionem,  quam  toties  pollicitus  fuerat,  magna  ex  parte  referri  ac  extendi  debet.  Porro  quum  arcana  inspiratione  posset  Christus  gratiam  conferre  apostolis,  visibilem  flatum  addere  voluit  ad  eos  melius  confirmandos.  Symbolum  autem  hoc  sumpsit  Christus  a  vulgari  scripturae  more,  cui  tritum  est  spiritum  conferre  vento:  cuius  similitudinis  ratio  breviter  exposita  fuit  supra  capite  tertio.  Sed  observent  lectores,  externo  et  visibili  symbolo  simul  verbum  coniungi.  Nam  et  hinc  sacramenta  vim  suam  mutuantur:  non  quod  in  voce,  quae  auribus  personat,  inclusa  sit  spiritus  efficacia,  sed  quia  a  testimonio  verbi  pendet  eorum  omnium  effectus,  quae  ex  sacramentis  percipiunt  fideles.  Flat  Christus  in  apostolos:  hi  non  flatum  modo,  sed  spiritum  quoque  recipiunt.  Cur,  nisi  quia  illis  Christus  promittit?  Similiter  in  baptismo  Christum  induimus,  abluimur  eius  sanguine,  crucifigitur  vetus  homo  noster,  ut  regnet  in  nobis  Dei  iustitia.  In  sacra  coena  spiritualiter  Christi  carne  et  sanguine  pascimur.  Unde  tanta  vis,  nisi  ex  Christi  .  promissione,  qui  spiritu  suo  efficit  ac