25:439  439  COMMENTARIUS  IN  IOSUE  CAP.  II.  440  esse  ducebant  hospitium  scorti,  vel  eximere  volebant  a  dedecore  mulierem,  quae  non  tantum  humaniter  exceperat  nuncios,  sed  fortitudine  et  prudentia  singulari  salvos  praestiterat.  Id  quidem  Rabinis  solenne  est,  quo  gentis  suae  existimationi  consulant,  scripturam  audacter  torquere,  suisque  commentis  invertere  quod  minus  videtur  honorificum.  Atqui  verisimile  est,  dum  fugitant  nuncii  hominum  conspectum  et  frequentiam,  ac  celebritatem  declinant,  venisse  ad  mulierem  quae  in  obscuro  recessu  habitabat.  Domus  enim  contigua  erat  urbis  muro:  imo  paries  exterior  domus  in  muro  locatus  erat.  Unde  colligitur  fuisse  angulum  ignobilem  procul  a  foro:  sicuti  meretrices  angiportus  et  loca  solitaria  ut  plurimum  incolunt.  Nec  vero  consentaneum  est,  vulgarem  fuisse  cauponam,  quae  promiscue  aperta  esset  quibuslibet,  quia  nec  familiari  colloquio  tanta  fuisset  libertas,  et  difficilis  ad  eos  occultandos  ratio.  Sic  igitur  statuo:  dum  se  clanculum  insinuant,  statim  se  in  latebras  abdidisse.  Porro  quod  mulier  ad  turpem  quaestum  ante  exposita  paulo  post  in  corpus  electi  populi  coaluit,  ut  fieret  ecclesiae  membrum,  id  Dei  gratiam  magis  illustrat,  dum  in  lupanar  penetravit,  ut  inde  non  Rabab  modo,  sed  patrem  quoque  et  fratres  extraheret.  Certe  quum  nomen  H31I  ubique  fere  scortum  significet,  nulla  ratio  hic  cogit  a  recepto  usu  discedere.  2.  Nunciatum  est  regi.  Probabile  est,  ut  dubiis  temporibus,  et  in  metu  belli  fieri  solet,  appositos  fuisse  custodes  qui  suspectos  hospites  notarent.  Propinqui  Israelitae,  qui  aperte  professi  fuerant  apud  Idumaeos  et  Moabitas  se  in  terra  Chanaan  sedem  quaerere:  formidolosa  erat  eorum  multitudo:  caesis  duobus  vicinis  regibus  amplam  ditionem  occupaverant  :  celebris,  ut  paulo  post  videbimus,  erat  fama  de  transitu  maris  rubri.  Nimiae  ergo  socordiae  fuisset,  liberum  transitum  per  urbem  Iericho  in  finibus  sitam  advenis  quibuslibet  permittere  in  discrimine  tam  manifesto.  Non  ergo  mirum  est,  homines  incognitos,  et  quos  multa  indicia  prodebant  hostili  animo  venisse,  statim  fuisse  ad  regem  delatos.  Quanquam  simul  colligimus,  fuisse  divinitus  excaecatos,  quod  portas  diligentius  non  custodierint,  quia  facile  erat,  ex  quo  ingressi  fuerant  retineri,  si  mediocris  adhibita  fuisset  sedulitas.  Imo  protinus  examinari  oportuit:  atque  ita  nullo  negotio  fuissent  deprehensi.  Sic  ergo  trepidarunt  cives  Iericho,  ut  Dei  iudicio  obstupefacti  nihil  ratione  vel  consilio  agerent.  Interea  in  easdem  fere  angustias  redacti  sunt  duo  nuncii,  ac  si  ad  poenam  trahendi  essent.  Rex  eos  accersit:  latent  in  caupona:  vita  eorum  ex  lingua  mulieris  non  secus  atque  e  filo  pendet.  Putarunt  nonnulli,  castigatam  hoc  modo  fuisse  diffidentiam  Iosue,  quia  solo  Dei  ductu  fretus  debuerat  secure  traiicere  Iordanem.