8:438  quelqu'un  allegue  qu'on  peut  bien  parvenir  au  royaume  des  cieulx  sans  abandonner  sa  maison,  ie  respon  que  ce  n'est  pas  sans  cause  que  nostre  Seigneur  appelle  ainsi  la  predication  de  l'Evangile  (Matth.  10,  7;  Luc.  9,  2).  Ceulx  donc  qui  en  sont  desnuez  et  ne  tiennent  compte  de  cercher  tous  les  moyens  qu'il  est  possible  d'en  iouir,  monstrent  bien  qu'ils  sont  par  trop  acharnez  aux  biens  du  monde,  et  qu'ils  ne  sont  pas  encores  disposez  a  en  faire  eschange  avec  le  royaume  des  cieulx.  S'ils  pouvoyent  posseder  les  deux  ensemble,  ie  ne  leur  en  porteroye  point  d'envie.  Mais  s'ils  ne  peuvent  [f.  69]  retenir  leur  possession  et  cropir  sur  leur  nid  sans  se  frauder  de  la  pasture  des  enfans  de  Dieu,  mesmes  s'ils  ne  peuvent  se  maintenir  en  l'estat  auquel  ils  sont  sans  se  retrancher  de  l'Eglise,  c'est  a  eulx  de  regarder  a  la  necessite  que  Dieu  leur  impose.  Il  leur  est  facile  d'amener  des  excuses  telles  quelles;  mais  tout  cela  ne  leur  servira  rien  quand  le  grand  Iuge  tonnera  de  sa  voix  horrible  sur  tous  ceulx  qui  auront  mieulx  aime  la  vie  terrienne,  laquelle  nous  est  commune  avec  les  bestes  brutes,  que  l'heritage  eternel,  lequel  il  a  desdie  a,  ses  enfans.  C'est  une  chose  estrange,  que  plusieurs  nous  cuident  clorre  la  bouche  si  nous  ne  leur  assignons  estat  et  moyen  de  vivre  en  servant  a  Dieu,  Ma  condition,  diront-ils,  est  telle  au  pais:  si  ie  la  laisse,  que  deviendray-ie,  ou  comment  seray-ie  nourri?  Comme  si  Dieu  avoit  ordonne  ceulx  qui  preschent  l'Evangile  maistres  d'hostel  pour  coucher  en  ses  estas  les  ungs  et  les  autres,  et  donner  a.  chascun  selon  sa  qualite,  pension  et  gages.  Si  nous  povons  aider  de  conseil  et  addresse,  nous  sommes  bien  tenus  de  le  faire,  encores  qu'on  ne  nous  en  requist  point:  mais  s'il  n'est  pas  en  nous,  est-ce  a  dire  que  nous  ayons  perdu  la  liberte  d'enseigner  a  chascun  ce  que  Dieu  luy  commande?  Combien  que  s'ils  avoyent  apprins  et  retenu  ceste  doctrine  de  David,  d'aimer  mieulx  un  petit  anglet  au  sueil  du  Temple  de  Dieu  que  les  lieux  les  plus  haults  et  les  plus  honorables  qu'ils  pourroyent  choisir  entre  les  infideles,  ils  ne  se  trouveroyent  pas  si  empeschez  a  prendre  conseil.  Mais  le  mal  est  qu'ils  se  veulent  tenir  en  leur  entier,  et  ne  peuvent  souffrir  d'estre  amoindris  en  honneurs  et  richesses,  ni  estre  privez  de  leurs  aises  et  delices,  c'est  a  dire  qu'ils  ne  peuvent  plier  le  col  et  se  courber  pour  porter  Iesus  Christ.  Qu'ils  plaident  la  dessus  tant  qu'ils  vouldront,  si  fauldra-il  a  la  fin  qu'ils  perdent  leur  cause.  Quant  a  ceulx  qui  ont  desia  quiete  leur  pais  pour  venir  en  lieu  ou  ils  puissent  franchement  servir  a  Dieu,  et  ou  la  verite  de  l'Evangile  leur  soit  fidelement  preschee,  il  est  bien  mestier  qu'ils  reduisent  souvent  en  memoire  ceste  sentence,  pour  s'exercer  de  iour  en  iour  a  la  practique  d'icelle,  et  s'y  endurcir  par  longue  accoustumance.  Car