47:437  437  CAPUT  XX.  438  Hebraeos,  qui  pacis  nomine  fausta  omnia  et  prospera,  quae  expeti  solent  ad  beatam  vitam,  designant.  Tantundem  ergo  valet  loquutio  ac  si  dicas:  Bene  et  feliciter  sit  vobis.  Quod  ideo  moneo,  quia  nonnulli  frustra  de  pace  et  concordia  hic  philosophantur,  quum  nihil  aliud  Christo  propositum  fuerit  quam  discipulis  bene  precari.  20.  Ostendit  eis  manus.  Hanc  confirmationem  addi  oportuit,  ut  modis  omnibus  illis  compertum  esset,  Christum  resurrexisse.  Si  cui  indignum  et  alienum  esse  videtur  Christi  gloria,  quod  vulnera  adhuc  a  resurrectione  gestet,  primum  cogitet,  Christum  non  tam  sibi  quam  nobis  resurrexisse:  deinde,  quidquid  in  salutem  nostram  est  esse  illi  gloriosum.  Nam  quod  se  ipsum  ad  tempus  exinanivit,  in  eo  nihil  decessit  eius  maiestati.  Iam  quum  vulnera  ista,  de  quibus  nunc  agitur,  ad  illustrandam  resurrectionis  fidem  valeant,  minime  derogant  eius  gloriae.  Si  quis  autem  hinc  colligat,  Christum  adhuc  habere  confossum  latus  et  manus  perforatas,  ridiculus  erit,  quum  certum  sit  temporalem  fuisse  vulnerum  usum,  donec  certo  persuasi  essent  apostoli  ipsum  a  morte  resurrexisse.  Quum  dicit  Ioannes,  gavisos  esse  discipulos  domini  conspectu,  significat  quidquid  moeroris  mors  Christi  illis  attulerat  nova  vita  fuisse  discussum.  21.  Dixit  iterum:  Pax  vobis.  Secunda  haec  salutatio  non  alio  mihi  videtur  spectare,  nisi  ut  sibi  audientiam  faciat  Dominus,  qualem  merebatur  rerum  de  quibus  acturus  erat  magnitudo  et  gravitas.  Quemadmodum  misit  me.  His  verbis  suos  apostolos  quodammodo  inaugurat  Christus  in  officium,  cui  prius  eos  destinaverat.  Dimissi  quidem  ante  fuerant  per  Iudaeam,  sed  tantum  ut  praecones,  qui  iuberent  audiri  summum  doctorem,  non  autem  ut  apostoli,  qui  perpetuum  obirent  docendi  munus.  Nunc  autem  eos  dominus  legatos  sibi  ordinat,  qui  regnum  eius  in  mundo  constituant.  Maneat  igitur  hoc  fixum,  apostolos  nunc  primum  institui  ordinarios  evangelii  ministros.  Perinde  autem  valent  eius  verba  ac  si  diceret  se  doctoris  officio  hactenus  defunctum  esse,  completo  igitur  cursus  sui  stadio  se  nunc  easdem  illis  mandare  vices.  Nam  intelligit  hac  lege  se  creatum  fuisse  a  patre  ecclesiae  doctorem,  ut  praeiret  reliquis  ad  tempus,  deinde  subrogaret  in  suum  locum  qui  absentis  vices  supplerent.  Qua  etiam  ratione  Paulus  (Eph.  4,  l  l  )  dicit  eum  dedisse  alios  apostolos,  alios  evangelistas,  alios  pastores,  qui  ecclesiam  usque  ad  finem  mundi  gubernent.  Primum  itaque  testatur  Christus,  quamvis  ipse  temporale  habuerit  docendi  munus,  evangelii  tamen  praedicationem  non  exigui  esse  temporis,  sed  aeternam  fore.  Deinde  ne  minor  sit  doctrinae  autoritas  in  ore  apostolorum,  iubet  in  eandem  quam  a  patre  accepit  functionem  ipsos  succedere,  eandem  illis  imponit  personam  atque  idem  iuris  assignat:  atque