47:436  19.  Quum  ergo  vesper  esset.  Iam  narrat  evangelista  Christi  conspectu  discipulis  probatam  fuisse  eius  resurrectionem.  Non  sine  Dei  providentia  contigit,  quod  in  unum  locum  omnes  convenerant,  ut  certior  ac  luculentior  esset  rei  fides.  Notandum  est  quam  clementer  egerit  cum  illis  Christus,  qui  nonnisi  ad  vesperum  suspensos  tenuit.  Adde  quod  eis  illuxit,  novae  vitae  pignus  afferens,  quum  se  mundo  tenebrae  offunderent.  Quod  simul  convenerant,  fidei  vel  saltem  pii  affectus  signum  fuit.  Quod  se  clausis  ianuis  tenebant  occultos,  in  eo  aliquid  infirmitatis  agnoscimus.  Nam  etsi  in  fortissimos  et  invictae  constantiae  homines  interdum  cadit  aliquis  metus,  sic  tamen  trepidasse  tunc  apostolos  colligere  promptum  est,  ut  fidei  defectum  proderent.  Exemplum  notatu  dignum  :  nam  etsi  minus  fortiter  se  gerunt  quam  deceat,  non  tamen  infirmitati  suae  indulgent.  Latebras  quidem  sibi  quaerunt  fugiendi  periculi  causa,  colligunt  tamen  animos,  ut  simul  maneant:  alioqui  dilapsi  essent  huc  et  illuc,  nec  quisquam  ausus  fuisset  alium  adspicere.  Hoc  modo  nobis  cum  infirmitate  carnis  nostrae  luctandum  est,  nec  fraenum  timori  laxandum,  qui  nos  ad  defectionem  sollicitat.  Et  Christus  zelum  eorum  benedicit,  dum  ita  congregatis  apparet,  et  Thomas  merito  privatur  communi  fratrum  suorum  gratia,  quod  tantum  vagus  aut  erraticus  miles  ab  unitatis  vexillo  discesserat.  Discant  ergo  qui  nimium  timidi  sunt,  sese  acuere  et  hortari  ad  corrigendum  carnis  suae  timorem.  Imprimis  vero  cavendum,  ne  metus  eos  dispergat.  Et  clausae  essent  ianuae.  Circumstantia  haec  diserte  addita  fuit,  quia  divinae  in  Christo  potentiae  illustre  specimen  continet.  Nam  quod  putant  quidam,  reseratas  illi  fuisse  fores  per  aliquem  et  humano  more  ingressum,  prorsus  a  mente  evangelistae  discrepat.  Sic  igitur  habendum  est  Christum  non  sine  miraculo  ingressum  esse,  ut  documentum  ederet  suae  divinitatis,  quo  suos  discipulos  magis  attentos  redderet:  interea  tamen  verum  esse  minime  concedo  quod  asserunt  papistae,  Christi  corpus  penetrasse  per  ianuas  clausas.  Hoc  ideo  contendunt,  ut  corpus  gloriosum  non  modo  reddant  simile  spiritui,  sed  immensum  esse,  nulloque  loco  contineri  obtineant.  Verum  nihil  tale  sonant  verba:  quia  non  dicit  evangelista  intrasse  per  ianuas  clausas,  sed  repente  stetisse  inter  discipulos,  quum  tamen  clausae  essent  ianuae,  nec  aditus  illi  esset  patefactus  manu  hominis.  Scimus  Petrum  e  carcere  obserato  egressum  esse:  an  ideo  dicendum  erit  per  medium  ferrum  et  asseres  penetrasse?  Facessant  ergo  pueriles  istae  argutiae,  quae  nihil  prorsus  habent  solidi  et  secum  trahunt  multa  deliria.  Nobis  sufficiat,  quod  Christus  insigni  miraculo  resurrectionis  suae  fidem  sancire  voluit  apud  discipulos.  Pax  vobis.  Vulgaris  est  salutandi  forma  apud