25:436  stare  in  acie:  sed  ordinem  servando  studii  promptitudinem  testari.  Nam  certum  est,  ut  erant  in  quatuor  vexilla  dispositi,  ita  fuisse  progressos.  Quod  autem  viros  bellicosos  nominat,  inde  colligitur  quod  alibi  clarius  patebit,  senibus  et  aliis  parum  robustis  permissum  fuisse,  domi  sua  negotia  curare,  vel  otiari,  si  essent  fracta  et  caduca  valetudine.  16.  Tunc  responderunt  Non  modo  acquiescunt,  sed  liberaliter  et  prolixe  deferunt  quod  debent  obsequium.  Atque  hoc  demum  est  rite  officio  perfungi,  hilariter  praestare  quod  Deus  exigit,  non  ex  moestitia,  ut  Paulus  loquitur  (2.  Cor.  9,  7).  Si  quis  obiiciat,  parum  verecunde  eos  iactare,  se  Mosi  fuisse  obedientes,  cui  saepe  fuerant  immorigeri,  respondeo,  quamvis  non  semper  quo  decebat  ardore  sequuti  fuerint,  tamen  satis  ad  parendum  fuisse  compositos,  ut  non  tolerabilis  modo  esset  eorum  modestia,  sed  summa  laude  digna,  si  reputemus  quam  superbe  eorum  patres  tumultuati  sint,  et  quanta  pervicacia  excutere  conati  fuerint  iugum  sibi  divinitus  impositum.  Loquuntur  enim  non  refractarii  illi,  a  quibus  se  fuisse  exacerbatum  conqueritur  Deus  in  Psalmo  (95,  8.  sqq.)  :  sed  qui  poenarum  exemplis  subacti  placide  se  submittere  didicerant.  Quanquam  non  tam  praedicant  suas  virtutes,  quam  extollunt  autoritatem  Iosue,  dum  profitentur  eodem  sibi  loco  fore,  quo  Mosen  habuerant.  Votum  quod  subiiciunt  simul  continet  fiduciae  materiam:  ut  Deus  adsit  servo  suo  Iosue,  sicut  opitulatus  fuerat  Mosi.  Ostendunt  enim  se  praesto  fore  ad  bellandum  sub  auspiciis  novi  ducis,  quia  persuasi  sint  Dei  virtute  esse  instructum  et  auxilio  victorem  fore  sperent:  sicuti  experti  fuerant  Deum  sibi  mirabiliter  adfuisse  per  manum  Mosis.  Hac  porro  fiducia  praeditos  fuisse  colligitur,  tum  quod  experimenta  gratiae  Dei  commemorant  ad  se  animandos,  tum  quod  Iosue  statuunt  Mosis  successorem,  quoad  felices  successus.  Neque  enim  pondere  caret  epitheton,  Deus  tuus:  sed  ad  continuandum  gratiae  Dei  cursum  pertinet.  Forma  tamen  loquendi  media  est  inter  fidei  gloriationem  et  votum.  Quanquam  ergo  bonam  spem  se  in  animis  alere  significant,  tamen,  ut  in  re  maxime  ardua,  simul  ad  preces  se  convertunt.  Certe  dum  mox  eum  ultro  ad  constantiam  hortantur,  se  eiusdem  fiduciae  comites  ac  socios  fore  demonstrant.  Ubi  notandum  est,  quamvis  omnibus  fortitudinis  exemplar  esset  Iosue,  eosque  tam  praeceptis  quam  factis  animaret,  vicissim  tamen  stimulos  praecurrenti  addi,  ut  sua  alacritate  melius  populum  incitet.