20:434  minorem  Lausanna  accersitus.  Heri,  quum  de  literis  Genevam  mittendis  secum  *  verba  facerem,  seria  iniunxit  ut,  quacunque  ratione  fieri  posset,  curarem  diligenter  salutem  suo  nomine  tibi  plurimam  impertiri,  atque  significari  memoriam  tui  absentis  apud  se  perpetuo  vigere  sanctissimeque  conservari.  Quod  equidem  ipsemet  significasset,  si  per  infinita  negotia  quibus  perpetuo  implicatur  manum  calamo  admovere  licuisset.  Sperabat  quidem  fore  ut  filius  maior  natu  ex  Gallia  rediens  te  inviseret  amicitiamque  renovaret.  Sed  ille  arrepta  induciarum  occasione  per  Antverpiam  iter  faciens  ad  nos  istis  diebus  se  recepit.  Iuvenis  certe  eximius,  multa  et  varia  scientia  ornatus,  tali  modestia  et  sobrietate  instructus  ut  inter  Germanos  aliquod  esse  monstrum  facile  dixeris.  Et  quod  rei  praecipuum  caput  est,  tanta  pietate  ac  timore  Dei  praeditus  ut  a  pulcherrimis  sanctissimasque  parentis  sui  vestigiis  ac  exemplis  nulla  in  re  degenerare  videatur.  Dominus  velit  in  eo  perficere  quod  incepit.  Hoc  ego  possum  asserere,  religionem  papisticam  paucos  tam  acres  inimicos,  tamque  sibi  hostiliter  infensos  in  Germania  habere  qualis  ipse  futurus  est,  si  ad  aliquam  dignitatem,  in  qua  maioribus  auspiciis  Antichristi  tyrannidem  labefactare  possit,  fuerit  evectus.  Itaque  quum  alia  via  quam  ipse  speraverat  filius  redierit,  et  hoc  pacto  se  exspectatione  sua  decidisse  videat,  iam  per  literas  id  efficere  conatur  quod  alioqui  filii  praesentia  longe  commodius  effecisset.  Non  igitur  erit  alienum  ab  humanitate,  prudentia  atque  adeo  constantia  tua  hanc  suae  voluntatis  significationem  boni  consulere,  teque  eodem  erga  ipsum  esse  animo  quo  ille  erga  te,  hoc  est,  longe  optimo.  Ex  imperii  rebus  nonnulla  hic  adscribi  curasset,  nisi  certo  persuasum  haberet  omnia  tibi  cum  D.  Heinrico  Bullingero,  ad  quem  de  rebus  omnibus  fusissime  scribere  solet,  esse  communia.  Superest  igitur  ut  et  suo  et  filii  meoque  nomine  plurimam  hic  salutem  apponam,  Deumque  suppliciter  orem  ut  in  omnium  ecclesiarum  ac  singulorum  Christianorum  utilitatem  te  nobis  diutius  salvum  incolumemque  conservet.  Vale,  vir  et  doctissime  et  piissime.  Augustae  Vindelicorum  pridie  idus  Iulii.  *)  Excellentiae  tuae  deditissimus  Thomas  Querculus  Andegavensis.  4177.  1)  Cal  Nov.  1554  Geryon  Seylerus  filium  suum  Calvino  commendaverat  (N.  2038),  quem  ille  absentem  non  vidit  Iam  alia  via  ex  Gallia  Augustam  rediit.  Scripta  ergo  haec  est  fortasse  a.  1555.  Querculus  ipse  antequam  Augustam  venerit  Lausannae  commorabatur,  ut  ipse  hic  dicit  Postea  eodem  rediit  {N.  2641)  et  a  Genevensibus  Lutetiam  missus  est  a.  1557  {N.  2661).  28