8:432  secourus,  nous  ne  reiections  point  le  secours  que  Dieu  nous  offre.  Il  y  en  a  d'aucuns  qui  se  desgoustent  encores  plus  expresseement.  Qu'ironsnous,  disent-ils,  faire  en  une  Eglise  ou  nous  verrons  des  troubles  et  scandales  qui  nous  [f.  62]  sont  maintenant  incogneus?  Si  aux  lieux  ou  on  presche  l'Evangile  il  y  avoit  telle  police  qu'il  seroit  bien  requis  pour  nous  edifier,  et  que  nous  fussions  asseurez  de  n'y  trouver  que  des  anges  qui  nous  menassent  en  Paradis,  nous  serions  esmeus  d'y  courir;  mais  quand  nous  serons  la  venus,  nous  orrons  parler  de  beaucoup  de  choses  qui  ne  feront  que  nous  scandalizer,  et  en  verrons  plus  qu'il  ne  seroit  besoing.  Il  y  aura  force  gens  desbauchez  qui  diffamcnt  l'Evangile  par  leur  vie  dissolue.  Les  vanitez,  les  pompes,  les  yvrongneries  et  choses  semblables  y  auront  leur  vogue  par  trop.  Qui  pis  est,  plusieurs  se  monstreront  contempteurs  de  Dieu  si  enormes,  qu'on  y  verra  une  plus  grande  impiete  qu'entre  les  Papistes.  Il  y  aura  aussi  bien  des  abus  et  corruptions  en  la  iustice  qu'ailleurs;  mesme  on  verra  beaucoup  a  redire  en  l'estat  des  prescheurs.  Les  uns  seront  nonchalans,  ou  bien  ils  seront  si  bien  empeschez  a  leur  proufit  particulier,  qu'il  ne  leur  chaulra  gueres  de  leur  office.  Qui  pis  est,  il  y  a  des  gaudisseurs  qui  ne  demandent  qu'a  faire  grand'  chere,  et  se  font  complices  des  plus  me^  schans  pour  avoir  licence  de  vivre  a  leur  poste.  Prenons  le  cas  qu'il  y  ait  dix  fois  pis:  si  est-ce  tousiours  une  excuse  frivole  a  ceulx  qui  se  mettent  une  barre  pour  ne  point  approcher  de  l'Eglise  de  Dieu.  Qu'ainsi  soit,  arrestons  nos  yeulx  a  l'exemple  de  David.  Ie  vous  prie,  du  temps  de  Saul,  y  avoit-il  une  telle  droicture  en  l'estat  de  iustice  comme  on  la  pourroit  souhaiter?  Au  contraire,  nous  oyons  les  complainctes  qu'il  fait  souvent  de  la  malice,  des  fraudes,  de  la  cruaulte  et  orgueil,  tant  du  Roy  que  de  ses  officiers.  Les  Sacrificateurs  et  Levites  se  portoyent-ils  si  sainctement  qu'il  eust  occasion  de  s'en  contenter?  Mais  plustost  nous  povons  recueillir  qu'une  grande  partie  adheroit  au  mal,  et  nourrissoit  les  iniquitez  en  les  flatant.  Au  commun  peuple  il  y  avoit  beaucoup  d'hypocrisie  et  beaucoup  de  vices  tout  manifestes.  Voyla  donc  l'Eglise  de  Dieu  pleine  de  beaucoup  de  corruptions:  toutesfois  David  n'est  point  degouste  d'y  entrer,  et  le  desir  qu'il  en  ha  ne  se  refroidit  point.  La  tentation  est  merveilleusement  dure,  ie  le  confesse:  car  selon  que  chascun  est  mieulx  touche  du  zele  de  l'honneur  de  Dieu,  d'autant  ha  il  plus  iuste  raison  de  se  contrister  et  ennuyer,  voyant  tels  opprobres  qu'on  luy  fait  en  polluant  son  Eglise.  Mais  le  remede  de  surmonter  tout  cela  nous  est  monstre  par  David,  c'est  de  cercher  [f.  63]  la  face  de  Dieu,  et  de  prendre  un  tel  contentement  au  seul  regard  d'icelle,  que  maulgre  toutes  les  fascheries  que  satan