55:432  colligimus,  ne  olei  quidem  legitimum  esse  usum  absque  fide.  Atqui  quum  papistis  adeo  nulla  constet  certitudo  suae  unctionis,  ut  palam  sit  dono  eos  carere,  illam  adulterinam  esse  patet.  15.  Et  si  peccata,  ete.  Non  est  hoc  additum  duntaxat  augendi  causa,  ac  si  dixisset,  maius  aliquid  Deum  aegroto  daturum  quam  corporis  sanitatem:  verum  quia  morbi  saepissime  irrogantur  ob  peccata,  de  horum  remissione  loquens,  causam  mali  sublatum  iri  significat.  Et  sane  videmus  ut  David  morbo  afflictus,  dum  levationem  optat,  totus  sit  in  petenda  peccatorum  venia.  Quorsum  hoc  nisi  quia  dum  culpae  suae  effectum  agnoscit  in  poenis,  non  aliud  remedium  esse  iudicat,  quam  si  Dominus  peccata  imputare  desinat?  Pleni  sunt  hac  doctrina  prophetae,  malis  levari  homines,  quum  ab  iniquitatum  reatu  solvuntur.  Ergo  hanc  demum  et  morbis  nostris  et  aliis  calamitatibus  sciamus  aptam  esse  medicinam,  si  de  placando  Deo  et  obtinenda  peccatorum  venia  solliciti,  nos  diligenter  examinemus.  16.  Confitemini  invicem  peccata  vestra,  et  orate  invicem  alii  pro  aliis,  ut  salvemini.  Multum  valet  precatio  iusti  efficax.  17.  Elias  homo  erat  passionibus  similiter  obnoxius  ut  nos,  et  precatione  precatus  est  ne  plueret,  et  non  pluit  semper  terram  annos  tres  et  sex  menses.  18.  Et  rursum  oravit,  et  coelum  dedit  pluviam,  et  terra  protulit  fructum  suum.  16.  Confitemini  invicem.  In  nonnullis  codicibus  inseritur  illativa  particula:  neque  male  quadrat.  Nam  ut  non  exprimatur,  subaudienda  tamen  est.  Dixerat  peccata  remitti  aegrotis  super  quos  orarint  presbyteri:  nunc  admonet  quam  utiliter  peccata  nostra  fratribus  retegamus:  quia  scilicet  eorum  intercessione  poterimus  veniam  consequi.  Scio  locum  hunc  a  multis  exponi  de  reconciliandis  offensis:  nam  qui  redire  in  gratiam  volunt,  eos  culpam  suam  agnoscere  prius  et  fateri  necesse  est.  Inde  enim  fit  ut  radices  agant  inimicitiae,  imo  augeantur,  ac  fiant  irreconciliabiles:  quia  unusquisque  causam  suam  pertinaciter  defendit.  Putant  ergo  multi  Iacobum  hanc  ostendere  viam  fraternae  reconciliationis,  si  mutuo  agnoscant  peccata  sua:  sed  alio  respexit,  quemadmodum  dictum  est.  Mutuam  enim  precationem  cum  mutua  confessione  coniungit:  quo  significat  in  hoc  prodesse  confessionem,  ut  fratrum  precibus  iuvemur  apud  Deum.  Nam  qui  necessitatis  nostrae  conscii  sunt,  ad  orandum  incitantur,  ut  nobis  subveniant:  quos  vero  latent  morbi  nostri,  ii  ad  opem  nobis  ferendam  sunt  segniores.  Mira  vero  papistarum  vel  stultitia,  vel  improbitas,  qui  susurratoriam  suam  confessionem  hoc  testimonio  astruere  conantur.  Nam  ex  verbis  Iacobi  inferre  promptum  esset,  solos  sacrificos  debere  confiteri.  Quando  enim  mutua  hic  vel  reciproca  (ut  crassius  loquar)  con-