54:432  attribue  a��  tous  Pasteurs,  monstre  desia  a  quoy  c'est  que  Dieu  les  appelle,  et  ce  qu'ils  doivent  a  son  Eglise,  afin  que  les  hommes  ne  cuident  point  pouvoir  estre  estimez  Prelats,  et  cependant  se  reposer  et  dormir,  et  faire  grand'  chere.  Car  Dieu  ne  choisit  point  ceux  qu'il  constitue  Pasteurs  en  son  Eglise,  pour  leurs  beaux  yeux  (comme  on  dit),  mais  c'est  en  les  obligeant  a  tout  le  peuple:  car  autrement  nous  ne  pouvons  servir  a  Dieu,  sinon  en  nous  employant  au  service  de  tout  son  troupeau:  et  le  plus  grand  honneur  que  puissent  avoir  les  Ministres  de  la  parole,  c'est  de  bien  servir  a  tous  les  fideles.  Or  venons  maintenant  a  ce  que  sainct  Paul  adiouste.  Il  dit  que  c'est  bien  raison  que  les  surveillans  soyent  sans  crime,  puis  qu'ils  sont  gouverneurs  en  la  maison  de  Dieu.  Comme  aussi  nous  avons  veu  qu'il  disoit  a  Timothee,  Advise  bien  comme  tu  te  dois  porter  en  l'Eglise:  car  c'est  la  maison  de  Dieu,  il  y  preside,  il  y  fait  sa  demeurance:  puis  qu'ainsi  est  qu'il  t'a  constitue  la  en  son  lieu,  il  faut  bien  que  tu  chemines  droitement.  Est-ce  peu  de  chose  d'estre  procureur  de  Dieu,  et  avoir  la  place  pour  gouverner  sa  maison?  Et  ainsi  en  ce  passage  sainct  Paul  nous  monstre  en  quelle  solicitude  doivent  cheminer  ceux  ausquels  Dieu  a  fait  cest  honneur  de  porter  sa  parole,  et  de  l'anoncer:  car  en  ce  faisant  il  veut  qu'ils  gouvernent  sa  famille.  Mais  d'autre  coste,  nous  avons  a  recueillir  de  ce  passage  une  doctrine  de  grande  consolation  et  singuliere.  Car  Dieu  nous  honore  tant  et  plus  quand  il  nous  daigne  appeller  en  sa  maison,  que  nous  soyons  ses  domestiques,  qu'il  habite  au  milieu  de  nous,  qu'il  y  ait  son  repos.  Or  cela  ne  se  peut  faire  que  nous  ne  luy  soyons  prochains,  et  qu'il  n'ait  tousiours  l'oeil  sur  nous,  qu'il  n'ait  quant  et  quant  le  soin  de  nous  gouverner  et  nourrir.  Voila  donc  qui  nous  doit  bien  esmouvoir  quand  nous  entendons  que  nous  ne  sommes  point  separez  de  nostre  Dieu,  et  que  nous  ne  croyons  point  a  credit  (comme  on  dit),  que  nous  n'allons  point  al'esgaree,  mais  qu'il  nous  recueille  en  son  troupeau,  voire  a  telle  condition  qu'il  est  avec  nous,  et  sera  iusques  en  la  fin  du  monde.  Or  cela  nous  doit  quant  et  quant  inciter  a  l'aimer  d'un  courage  tant  plus  ardent,  et  a  le  servir.  Car  puis  qu'ainsi  est  que  Dieu  nous  a  sous  sa  garde,  qu'il  nous  fait  habiter  en  sa  famille,  et  qu'il  nous  est  pour  Pere  et  Maistre,  et  qu'il  constitue  des  procureurs  afin  que  tout  aille  comme  il  appartient,  qu'il  y  ait  ordre,  que  rien  ne  soit  dissipe  entre  nous:  quand  nous  voyons  que  Dieu  se  declare  d'une  facon  tant  privee,  ne  sommesnous  point  trop  ingrats  si  nous  ne  sommes  du  tout  adonnez  a  l'aimer  et  a  le  servir?