47:432  tum  novas  subinde  facies  instar  Protei  cuiusdam  induisse,  sed  esse  in  Dei  arbitrio,  qui  oculos  dedit  hominibus,  aciem  eorum  quoties  ita  visum  est  hebetare,  ut  videndo  non  videant.  Imo  in  Maria  habemus  commune  errorum  humanae  mentis  exemplar.  Quamvis  enim  se  offerat  Christus  in  conspectum,  varias  tamen  formas  illi  af&ngitnus,  ut  quidvis  potius  concipiat  sensus  noster  quam  verum  Christum.  Nam  quum  per  se  fallax  sit  mentis  nostrae  adspectus,  fascinatur  etiam  a  mundo  et  Satana,  ne  quid  veri  discernat.  15.  Domine,  si  tu  sustulisti  eum.  Dominum  appellat  communi  gentis  suae  usu  :  nam  agricolas  quoque  et  alios  ignobiles  homines  Hebraei  dominos  salutant.  Videmus  autem  Mariam  nihil  adhuc  nisi  terrestre  sapere.  Christi  tantum  cadaver  nancisci  cupit,  ut  sepulcro  reconditum  teneat:  quod  vero  praecipuum  est  omittit,  ut  adspiret  ad  divinam  resurrectionis  eius  virtutem.  Quare  non  mirum  est,  si  tam  crassus  affectus  velum  opponat  eius  oculis.  16.  Dicit  ei  Iesus:  Maria.  Conversa  illa  dixit  ei:  Rabboni,  quod  dicitur  magister.  17.  Dicit  ei  Iesus:  N'e  me  tangas  :  nondum  enim  adscendi  ad  patrem  meum  :  sed  vade  ad  fratres  meos  et  dic  eis:  Adscendo  ad  patrem  meum  et  patrem  vestrum,  et  Deum  meum  et  Deum  vestrum.  18.  Venit  Maria  Magdalena  annuntians  discipulis  quod  vidisset  Dominum  et  haec  dixisset  ei.  16.  Maria.  Quod  Mariam  ad  breve  tempus  errare  passus  est  Christus,  utile  nobis  fuit  ad  fidei  certitudinem  :  nunc  autem  ab  errore  ipsam  verbulo  uno  revocat.  Prius  eam  alloquutus  fuerat,  sed  ille  erat  quasi  ignoti  hominis  sermo:  nunc  recepta  magistri  persona  compellat  nomine  discipulam,  quemadmodum  habuimus  decimo  capite,  quod  bonus  pastor  nominatim  ad  se  vocet  singulas  gregis  sui  oves.  Vox  ergo  ista  pastoris  penetrat  in  animum  Mariae,  oculos  illi  aperit,  sensus  omnes  excitat  et  afficit,  ut  protinus  se  Christo  tradat.  Ita  in  Maria  depictam  habemus  vocationis  nostrae  imaginem.  Nam  hic  unus  in  veram  Christi  notitiam  ingressus  est,  si  nos  ipse  prior  cognoscat,  deinde  familiariter  ad  se  invitet,  non  illa  communi  voce,  quae  promiscue  insonat  omnium  auribus,  sed  qua  peculiariter  oves  sibi  a  patre  datas  vocat.  Ideo  Paulus  (Galat.  4,  9):  Postquam,  inquit,  cognovistis  Deum,  imo  cogniti  estis  ab  eo.  Porro  efficacia  sermonis  inde  apparet,  quod  statim  Maria  debitum  Christo  honorem  tribuit.  Nomen  enim  Rabboni  non  modo  honorificum  est,  sed  professionem  continet  obedientiae.  Testatur  ergo  Maria  se  Christi  discipulam,  et  illi  tanquam  magistro  se  addicit.  Haec  mirabilis  est  atque  arcana  humanae  mentis  conversio,  quum  Deus,  suo  eam  spiritu  illustrans,  ex  obtusa  vel