37:432  mittit.  Nam  etsi  populo  suo  semper  benedixit  Dominus,  tamen  suspensae  quodammodo  erant  benedictiones  usque  ad  Christi  adventum,  in  quo  solida  et  plena  apparuit  felicitas.  Summa  est,  tam  Iudaeos  quam  gentiles  omni  ex  parte  beatos  fore  sub  regno  Christi.  Quemadmodum  autem  signum  irae  Dei  et  maledictionis  est,  quum  nullum  ex  labore  nostro  fructum  percipimus:  ita  ex  adverso  benedictionis  signum  est,  quum  laboris  nostri  fructus  nobis  constat.  Propterea  dicit  non  frustra  laborem  consumpturos,  nec  lusuros  operam  qui  ab  exsilio  reversi  erunt,  ut  potiantur  vera  et  plena  redemptione.  Lex  minatur  orbitatem,  bella  hostilia,  privationes  bonorum,  terrorem  in  animis:  ex  adverso  hic  promittitur  foecunditas,  pax,  fructus  laboris,  tranquillitas.  Atque  huiusmodi  benedictiones  diligenter  notandae  sunt.  Nam  pauci  sunt  qui  in  suis  laboribus  benedictionem  Dei  reputent,  ut  ei  soli  omnia  attribuant,  ac  persuasum  habeant  se  nihil  omnino  effecturos  nisi  Dominus  prosperum  successum  donet.  Ergo  ut  omnis  benedictio  optanda  est  a  Deo,  ita  ei  soli  acceptam  ferre  convenit.  Quod  sequitur,  Non  parituras  mulieres  in  terrore,  quidam  ita  exponunt,  partum  non  fore  tristem,  vel  formidolosum,  quia  expertes  erunt  doloris.  Scimus  hanc  poenam  inflictam  esse  mulieri  ob  peccatum,  ut  pariat  cum  labore,  ac  periculum  mortis  subeat.  Generantur  enim  liberi  cum  metu  et  trepidatione,  quum  aliqua  est  suspicio  belli  :  et  probabile  est  huc  potius  respicere  prophetam,  nempe  eam  fore  tranquillitatem,  ut  neque  mulieribus,  neque  viris  trepidandum  sit.  Nam  ad  utrosque  parentes  hoc  referendum  est,  qui  posteris  suis  non  metuent,  ut  fieri  solet  quoties  impendet  aliquid  discriminis.  (Quia  semen  benedictum)  Optime  convenit  haec  ratio.  Unde  enim  metus  ac  terrores,  unde  inquietudines,  nisi  ex  maledictione  Dei?  Sublata  igitur  maledictione  merito  dicit  propheta  parentes  cum  sua  sobole  immunes  fore  a  formidine  et  anxia  cura:  quoniam  persuasi  erunt  propitio  Deo  se  tutos  semper  fore  et  salvos.  Soboles.  Hoc  contrarium  est  orbitati  quae  inter  maledictiones  Dei  numeratur.  Idem  ergo  est  ac  si  diceret:  Non  privabo  amplius  eos  filiis  quos  genuerint:  sed  efficiam  ut  iis,  cum  reliquis  beneficiis  quibus  ipsos  ornabo,  perfruantur.  24.  (Et  erit)  Insignis  promissio.  Nihil  enim  optabilius  est,  quam  ut  Deum  propitium  habeamus,  atque  nobis  ad  eum  facilis  accessus  pateat.  Nam  etsi  infinitae  aerumnae  et  calamitates  nos  circumstant,  tamen  miseri  esse  non  possumus  quamdiu  nobis  ad  Dominum  confugere  licet.  Hic  igitur  promittit  Dominus  nos  non  frustra  precaturos.  Atqui  hoc  etiam  patribus  sub  lege  promissum  erat.  Certum  est  enim  exauditos  ab  initio  mundi  fuisse  patres,  quicunque  ipsum  invocarunt.  Nam  hic  praecipuus  fidei  fructus  est.  Sed  hoc  magis  ac