25:432  accendit,  ut  misere  tumultuemur  in  minimis  quibusque  periculis,  donec  statuerimus,  et  Deum  nobis  affore,  et  ad  nos  tuendos  satis  superque  in  eo  fore  praesidii.  Et  vero  ubi  non  aliud  timiditati  nostrae  sanandae  remedium  praescribit,  praesentiam  sui  auxilii  debere  nobis  sufficere  admonet.  6.  Confirmare  ergo.  Subiicitur  exhortatio  ad  fortitudinem,  et  quidem  repetita,  quo  vehementius  afficiat.  Quanquam  adhuc  interponitur  promissio  aliis  verbis,  ubi  suae  vocationis  certior  redditur  Iosue,  ne  dubitanter  provinciam  suscipiat,  quam  sibi  divinitus  iniunctam  esse  novit:  aut  etiam  si  cum  obstaculis  luctandum  sit,  ne  in  medio  cursu  vacillet.  Neque  enim  satis  fuisset,  strenue  se  initio  accingere,  nisi  probe  simul  fuisset  comparatus  ad  perseverantiam.  Etsi  autem  fidei  proprium  est  nos  animare  ad  strenue  agendum,  sicuti  rursus  ignavia  et  cessatione  detegitur  incredulitas:  colligere  tamen  licet  ex  hoc  loco,  non  satis  vigere  nudas  promissiones,  nisi  accedant  exhortationum  stimuli.  Nam  si  Iosue,  cuius  singularis  alioqui  erat  alacritas,  ad  praestandum  officium  incitandus  fuit;  quanto  acrius  nos  pungi  oportet,  qui  tanta  pigritie  laboramus?  Adde  quod  non  semel,  nec  uno  verbo  exigitur  robur  et  constantia  a  Iosue:  sed  quia  multis  et  variis  certaminibus  exercendus  erat,  saepius  et  pluribus  verbis  confirmatur.  Iubetur  forti  et  infracto  esse  animo.  Quamvis  ex  duobus  verbis  pateret,  de  re  maxime  seria  Deum  praecipere,  tamen  hac  duplicatione  non  contentus,  eandem  mox  sententiam  iterat  cum  amplificatione:  quia  adiungit  adverbium  valde.  Discamus  itaque  ex  hoc  loco,  nunquam  arduis  et  difficilibus  negotiis  exsequendis  nos  fore  pares,  nisi  summa  contentione  nitamur:  quia  et  imbecilla  est  nostra  facultas,  et  Satan  duriter  nos  oppugnat,  et  nihil  proclivius  est,  quam  animos  remittere.  Caeterum  quia  multi  erratico  vagoque  conatu  nervos  frustra  intendunt:  additur  vera  fortitudinis  ratio  ut  Iosue  suum  omne  studium  applicet  ad  servandam  legem.  Quo  docemur,  ita  nos  demum  fore  inexpugnabiles,  si  ad  praestandum  fidele  Deo  obsequium  enitamur.  Alioqui  praestaret  molles  et  lentos  iacere,  quam  praecipiti  audacia  ferri.  Porro  non  simpliciter  Deus  servum  suum  vult  esse  fortem  ad  legem  servandam:  quin  potius  eum  viriliter  contendere  iubet,  ne  sub  onere  laboriosi  muneris  fatiscat:  sed  quia  obrepere  poterat  dubitatio,  quomodo  se  expediret  in  rebus  perplexis,  et  quodnam  caperet  consilium:  ad  legis  doctrinam  eum  revocat,  quia  se  illic  praeeuntem  sequendo  satis  ad  omnia  erit  instructus.  Prudenter,  inquit,  ages  in  omnibus,  modo  te  sub  legis  magisterio  contineas.  Quanquam  verbum  hebraicum  bjW,  non  tantum  prudenter  sed  etiam  feliciter  agere  significat,  quia  ut  plurimum  temeritas  infortuniis  plectitur.  Quidquid  sit  ita  certius  animatur  ad  sperandum  Dei  auxilium,