47:431  431  IN  EVANGELIUM  IOANNIS  432  illorum  tamen  stupor  minus  erat  excusabilis,  qui  tam  probe  et  exacte  edocti  tam  male  profecerant.  Certe  non  sine  eorum  pudore  mulieres  elegit  Christus,  quibus  se  primum  patefaceret.  Porro  incertum  est,  angelosne  cognoverit  Maria  an  homines  esse  putaverit.  Albas  vestes  scimus  gloriae  coelestis  fuisse  symbolum:  sic  albis  vestibus  indutus  fuit  Christus,  quum  in  monte  tribus  apostolis  conspicua  fuit  eius  maiestas.  Idem  refert  Lucas  de  angelo,  qui  Cornelio  apparuit.  Nec  infitior  lineas  vestes  in  usu  fuisse  Orientalibus:  sed  Deus  in  ornatu  angelorum  singulare  aliquid  et  insolitum  ostendit,  et  quasi  notas  impressit  quibus  discerni  possent  ab  hominibus.  Adde  quod  Matthaeus  adspectum  angeli,  qui  loquutus  est  cum  mulieribus,  fulguri  comparat.  Potest  tamen  fieri,  ut  timorem  solum  ex  admiratione  earum  mentibus  incusserit:  nam  attonitas  stetisse  apparet.  Caeterum  quoties  visibili  hominum  specie  et  vestibus  indutos  apparuisse  angelos  legimus,  hoc  hominum  ruditati  datum  fuit.  Veris  etiam  corporibus  interdum  fuisse  indutos  non  dubito.  Verum  an  sola  fuerit  corporum  species  in  duobus  istis  angelis,  quia  supervacuum  est  inquirere,  in  medio  relinquam.  Mihi  sufficit  datam  fuisse  illis  a  Domino  humanam  formam,  ut  conspici  et  audiri  possent  a  mulieribus:  ornatu  autem  non  vulgari  et  inusitato  fuisse  praeditos,  qui  eos  ab  hominum  ordine  discernens  divinum  aliquid  et  coeleste  ostenderet.  Unum  ad  caput  et  unum  ad  pedes.  Quod  apud  Matthaeum  nonnisi  unius  angeli  fit  mentio,  a  Ioannis  narratione  non  discrepat.  Neque  enim  ambo  simul  Mariam  alloquuti  sunt,  sed  alter  eorum  cui  commissa  erat  legatio.  Allegoria  Augustini  non  satis  firma  est,  quod  ille  angelorum  situs  indicaverit  praedicandum  evangelium  ab  ortu  ad  occasum  usque  solis.  Hoc  potius  notatu  dignum  est,  talibus  auspiciis  inchoasse  Christum  regni  sui  gloriam.  Nam  quod  angeli  sepulcrum  eius  honorant,  eo  non  tantum  aboletur  crucis  ignominia,  sed  coelestis  Christi  maiestas  affulget.  13.  Mulier,  quid  ploras?  Plura  dixisse  angelum  ex  aliis  evangelistis  colligere  promptum  est,  sed  Ioannes  summam  breviter  delibat,  quia  hoc  satis  erat  testandae  Christi  resurrectioni.  Est  autem  obiurgatione  et  consolatione  mixta  oratio:  obiurgat  angelus  importunum  Mariae  fletum,  simul  tamen  laetitiam  miscet,  dum  flendi  causam  esse  negat,  quia  resurrexerit  Christus.  14.  Videt  Iesum  stantem.  Quaeri  potest,  unde  hallucinatio  haec,  quod  Iesum  Maria  non  agnoscit,  qui  plus  quam  familiariter  notus  illi  esse  debebat.  Putant  quidam  ipsum  aliena  forma  apparuisse,  sed  ego  in  mulierum  oculis  potius  vitium  fuisse  existimo:  quemadmodum  de  duobus  discipulis  habetur  apud  Lucam  (24,  16).  Non  ergo  dicemus,  Chris-