32:431  431  PSALMUS  CXLVIII.  432  Nam  plus  quam  insipidum  esse  oportet  quem  tam  subitae  nives  ac  pruinae  de  hac  verbi  Dei  celeritate  non  docent.  Itaque  nisi  velimus  praepostere  in  operibus  Dei  philosophari,  semper  ab  hoc  principio  incipere  convenit,  singulas  mundi  partes  ad  Dei  arbitrium  intentas  esse,  ut  totus  naturae  cursus  nihil  aliud  sit  quam  prompta  eorum  quae  mandavit  exequutio.  Nam  certe  dum  se  aquae  conglaciant,  dum  per  aerem  spargitur  grando,  dum  pruinae  coelum  obscurant,  hinc  apparet  quam  efficaciter  loquatur.  Quod  si  maior  pars  mundi  ad  haec  tot  miracula  obstupescit,  frigoris  asperitas,  qua  obrigescunt  corpora,  nos  Dei  potentiam  mirari  cogat.  Nam  certe  quum  aestate  nos  torreat  solis  calor:  deinde  hyems  succedens,  omnia  contrahat:  mutatio  haec  quae  extra  usum  incredibilis  esset,  aperte  clamitat  aliquod  regnare  in  coelis  numen.  19.  (Annuntiat  sermones  suos  Iacob.)  Hic  alterius  sermonis  quam  paulo  ante  fit  mentio:  quia  aliter  creaturis  sensu  carentibus  praecipere  dicitur  Deus,  quas  arcana  inclinatione  tacitus  in  obsequium  suum  dirigit,  quam  hominibus  intelligentia  praeditis,  quos  articulate  docet  ut  scientes  et  volentes  sequantur  quo  ipse  vocat.  Etsi  autem  quae  prius  recensuit  beneficia  non  vulgari  pretio  digna  sunt,  hoc  tamen  longe  praecellit,  quod  in  tradenda  pietatis  doctrina,  quae  aeternae  salutis  thesaurus  est,  magistri  officio  erga  electum  populum  fungi  dignatur.  Quantulum  enim  hoc  prodesset,  caducis  bonis  affluere  ecclesiam,  et  ab  hostium  violentia  defendi,  si  spes  eius  supra  mundum  non  assurgeret?  Hoc  igitur  summum  gratiae  specimen  est,  coelestis  vitae  lucem  in  verbo  suo  proponere.  Ideoque  non  abs  re  tanquam  verae  et  solidae  felicitatis  cumulus  hic  apponitur.  Hinc  vero  discamus,  non  modo  reverenter  piaque  observantia  excipere  Dei  doctrinam,  sed  amanter  quoque  amplecti:  quia  nihil  suavius  vel  optabilius  fingi  potest,  quam  Deum  salutis  nostrae  curam  suscipere,  idque  familiariter  testari  dum  porrecta  manu  ad  se  nos  ducit.  Hic  enim  scopus  est  doctrinae,  ut  in  densis  huius  mundi  tenebris,  et  inter  tot  flexuosos  errores,  quibus  humanum  genus  vagum  circumagit  Satan,  nobis  praeluceat  optimus  pater,  donec  in  coelestem  haereditatem  colligamur.  Notandum  vero  adscribi  Deo  partes  quas  eius  mandato  exsequuti  sunt  Moses  et  prophetae:  quia  tunc  demum  pietatis  doctrinae  iustus  defertur  honos,  et  pro  suo  merito  aestimatur,  ubi  in  Deum  erigimus  mentes:  qui  sic  hominum  utitur  opera,  ut  sibi  interim  summi  et  unici  doctoris  munus  minime  abroget.  Ergo  ab  auctoris  persona  hic  sua  asseritur  verbo  maiestas:  et  tandem  gratiam  illam  comparatione  amplificat  propheta,  non  ita  reliquis  gentibus  factum  esse  admonens.  Nam  si  quaeritur  causa  cur  populum  unum  reliquis  Deus  praetulerit,  certe  ad  fontem  gratuitae  electionis  praestantia  ipsa  nos  de-