54:430  mis  ceste  humilite-ci  pour  la  vertu  la  plus  requise,  aux  ieunes  gens:  mais  comme  elle  est  requise,  aussi  est-elle  bien  rare.  Qu'on  regarde  quelle  est  la  ieunesse.  Auiourd'huy  comment  les  enfans  se  laissent-  ils  gouverner?  Il  est  vray  que  les  peres  sont  bien  dignes  souventesfois  que  leurs  enfans  leur  crevent  les  yeux:  car  il  ne  leur  chaut  de  les  instruire  en  la  crainte  de  Dieu,  n'est-ce  pas  raison  qu'ils  ayent  un  salaire  de  mesmes?  Mais  c'est  une  chose  a.  deplorer  quand  on  voit  les  enfans  estre  rebelles,  qu'on  ne  les  peut  donter  en  facon  que  ce  soit,  quand  ils  seront  petis,  qu'on  ne  leur  peut  faire  gouster  que  c'est  du  bien.  Et  puis  sont-ils  venus  en  aage?  ie  ne  di  point  d'hommes,  pour  dire  qu'ils  soyent  hommes  faits,  mais  qu'ils  ne  soyent  plus  petis  enfans,  qu'ils  soyent  ieunes  compagnons,  qu'on  appelle:  ho,  si  voudront-ils  neantmoins  estre  appelez  hommes,  et  leur  semble  qu'on  leur  fait  grand  tort  si  on  les  nomme  autrement.  Ils  devroyent  encores  avoir  des  verges  d'ici  a  dix  ans  a  l'escole,  et  ils  voudront  cependant  estre  reputez  pour  grans  personnages.  Et  ie  leur  ay  dit  trop  de  fois,  Allez  babouins,  que  vous  soyez  hommes?  vous  devriez  estre  encores  sous  la  verge,  et  estre  la  tenus  en  bride.  Et  si  on  eust  voulu  recevoir  paisiblement  ces  admonitions,  il  ne  faudroit  point  maintenant  pleurer,  il  ne  faudroit  point  user  de  rudesse  telle  qu'on  la  voit,  il  ne  faudroit  point  qu'ils  fussent  chastiez  ainsi  honteusement,  s'il  y  eust  eu  quelque  prudence  et  discretion  en  eux.  D'autant  plus  donc  nous  faut-il  bien  noter  ce  qui  est  ici  dit  par  sainct  Paul,  et  que  les  peres  advisent  de  tenir  la  bride  roide  a  leurs  enfans,  et  s'ils  veulent  faire  des  hommes  quand  ils  doivent  estre  encores  sous  la  verge,  qu'ils  ne  les  espargnent  point.  Il  est  vray  que  les  peres  ne  doivent  point  molester  leurs  enfans,  ne  leur  donner  occasion  de  se  desbaucher  par  un  traittement  trop  rude:  mais  tant  y  a  qu'il  leur  faut  craindre  que  leurs  enfans  estans  ainsi  difficiles  a  gouverner,  ne  se  laschent  la  bride  pour  s'adonner  a  tout  mal,  et  se  desbaucher  en  sorte  qu'on  ne  peust  pas  les  ramener  au  bon  chemin:  et  quant  et  quant  que  les  ieunes  gens  recognoissent  aussi,  que  s'ils  n'ont  ceste  modestie  en  eux,  et  ceste  grace  de  se  laisser  gouverner  paisiblement  par  leurs  superieurs,  qu'il  faut  dire  fy  de  toutes  leurs  vertus:  comme  aussi  ce  ne  sera  rien,  il  n'y  aura  qu'orgueil  et  puantise,  et  Dieu  aussi  les  mettra  en  confusion.  Qu'un  chacun  donc  apprene  ceste  lecon,  comme  elle  est  ici  monstree  a  tous  en  ce  passage  de  sainct  Paul.  Or  nous-nous  prosternerons  devant  la  face  de  nostre  bon  Dieu  etc.