52:430  nulla  in  nobis  fuerint  iustitiae  opera.  Quae  ratio  non  valeret,  nisi  sumeret  illud  pro  confesso,  iniustum  esse  quidquid  ante  fidem  molimur.  Inepti  vero  sunt  qui  ex  praeterito  verbi  tempore  cavillantur  futura  hominum  merita  a  Deo  respici,  quum  ipsos  vocat.  Paulus,  inquiunt,  dum  provocari  Deum  negat  nostris  meritis,  quo  sua  gratia  nos  dignetur,  restringit  hoc  ad  tempus  praeteritum.  Ergo  si  praecedenti  tantum  iustitiae  non  est  locus,  futura  iustitia  in  rationem  venit.  Atqui  principium  usurpant,  quod  Paulus  ubique  reiicit,  quum  gratuitam  electionem  statuit  bonorum  operum  fundamentum.  Si  ex  sola  Dei  gratia  hoc  habemus,  ut  ad  bene  vivendum  simus  idonei:  quae  futura  nostra  merita  intueri  poterit  Deus?  Si  ante  Dei  vocationem  tale  in  nobis  regnum  occupat  iniquitas,  ut  nullum  progrediendi  finem  factura  sit  donec  culmen  suum  impleat:  quo  futurae  iustitiae  nostrae  respectu  allici  Deus  poterit  ad  nos  vocandos?  facessant  igitur  tales  nugae.  Paulus  non  alia  ratione  praeterita  opera  nominavit,  nisi  ut  omne  meritum  excluderet.  Perinde  enim  valent  eius  verba,  ac  si  dixisset,  Si  ullum  meritum  iactamus,  qualia  fuerunt  nostra  opera?  Stat  enim  axioma  illud,  non  meliores  fore  homines  quam  fuerint,  nisi  eos  Dominus  sua  vocatione  corrigeret.  Salvos  nos  fecit.  De  fide  loquitur:  et  nos  iam  salutem  adeptos  esse  docet.  Ergo  utcunque  peccato  impliciti  corpus  mortis  circumferamus,  certi  tamen  de  salute  nostra  sumus,  si  modo  fide  insiti  simus  in  Christum:  secundum  illud  (Iohan.  5,  24),  Qui  credit  in  filium  Dei,  transivit  de  morte  in  vitam.  Paulo  post  tamen,  fidei  nomine  interposito,  nos  re  ipsa  nondum  adeptos  esse  ostendet  quod  Christus  morte  sua  praestitit.  Unde  sequitur,  ex  parte  Dei  salutem  nostram  impletam  esse,  cuius  fruitio  in  finem  usque  militiae  nostrae  differtur.  Atque  id  est  quod  alibi  quoque  idem  Paulus  docet,  nos  spe  salvos  esse  factos  (Rom.  8,  24).  Per  lavacrum  regenerationis.  Non  dubito  quin  saltem  ad  baptismum  alludat.  Imo  facile  patiar  de  baptismo  locum  exponi  :  non  quod  in  externo  aquae  symbolo  inclusa  sit  salus,  sed  quia  partam  a  Christo  salutem  baptismus  nobis  obsignat.  Tractat  Paulus  de  exhibitione  gratiae  Dei,  quam  fide  constare  diximus.  Quum  ergo  pars  revelationis  baptismo  constet,  quatenus  scilicet  fidei  confirmandae  destinatus  est,  merito  eius  mentionem  facit.  Deinde  quum  baptismus  veluti  ingressus  sit  in  ecclesiam,  ac  symbolum  nostrae  in  Christum  insitionis,  tempestive  hic  adducitur  a  Paulo,  dum  ostendere  vult  quomodo  apparuerit  nobis  Dei  gratia.  Ut  talis  sit  orationis  contextus,  Deus  nos  salvos  fecit  sua  misericordia,  cuius  salutis  symbolum  ac  pignus  dedit  in  baptismo,  nos  in  suam  ecclesiam  cooptans,  et  inserens  in  corpus  filii  sui.  Solent  autem  apostoli  a  sacramentis  ducere  argumentum,  ut  rem  illic  signatam  probent  :