32:430  praesidio  munitam  esse,  ut  sibi  ab  hostibus  metuere  non  debeat.  Eodem  spectat  altera  quae  paulo  post  sequitur  loquutio  cunctos  eius  fines  positos  esse  pacem,  divinitus  scilicet  arceri  hostes,  ne  quid  molestiae  ac  turbarum  facessant.  Non  quod  semper  omni  ex  parte  pacata  sit  ecclesia,  nullasque  incursiones  sustineat:  sed  quia  manum  suam  Deus  ad  impetus  repellendos  manifeste  opponit  ut  secure  hostes  in  circuitu  despiciat.  Nisi  forte  latius  extendere  placeat  nomen  pacis:  sicuti  plerumque  pro  secundo  et  felici  statu  sumitur.  Sed  quia  fit  mentio  finium,  videtur  prior  ille  sensus  melius  quadrare.  Deinde  adiungitur  interior  Dei  benedictio,  qua  fit  ut  prospere  et  beate  in  ea  cives  habitent:  et  simul  large  ad  satietatem  usque  pascantur,  non  quod  semper  filiis  Dei  suppetant  lautitiae,  quae  eos  corrumperent,  ut  nimis  propensa  est  caro  ad  lasciviam:  sed  quia  in  victu  quotidiano  clarius  Dei  liberalitatem  perspiciunt  quam  increduli,  quos  vel  excaecat  sua  sagina,  vel  inopia  misera  sollicitudine  cruciat,  vel  etiam  insatiabilis  cupiditas  semper  urit.  Praesertim  vero  olim  patribus  sub  lege  paternus  Dei  favor  in  victus  abundantia  patefactus  est:  quia  talibus  rudimentis  altius  tunc  deduci  oportuit.  15.  Dum  emittit  eloquium  suum  terrae,  valde  celeriter  currit  sermo  eius.  16.  Qui  dat  nivem  sicut  lanam,  pruinam  quasi  cinerem  spargit,  17.  Proiicit  glaciem  suam  quasi  frusta:  coram  frigore  eius  quis  consistet:  18.  Mittit  sermonem  suum,  et  liquefaciet  ea:  Habit  spiritus  eius,  fluent  aquae.  19.  Annuntiat  sermones  suos  Iacob,  edicta  sua  et  iudicia  sua  Israeli.  20.  Non  fecit  sic  cuilibet  genti,  et  iudicia  non  manifestavit  illis.  Halleluiah.  15.  (Dum  emittit.)  Rursus  operum  Dei,  quae  in  naturae  ordine  passim  refulgent,  quasdam  species  attingit.  Sed  quia  aeris  et  terrae  mutationes,  quae  testimonia  esse  debebant  potentiae  eius,  mundus  fortuito  contingere  imaginatur:  antequam  de  nivo,  pruina  et  glacie  propheta  disserat,  diserte  exprimit  eius  imperio  et  nutu  terram  regi.  Emissio  enim  sermonis  nihil  aliud  est  quam  arcanus  motus,  quo  omnia  moderatur  et  temperat:  quia  nisi  iubente  ipso  et  ordinante,  nulla  in  elementis  esset  agitatio:  nec  proprio  instinctu  huc  vel  illuc  ferrentur,  nisi  praeiret  arcanum  eiusdem  mandatum.  Velociter  autem  dicit  sermonem  currere:  quia  simulac  ostendit  Deus  quid  fieri  velit,  praesto  ad  parendum  concurrent  omnia.  Quod  principium  nisi  tenemus,  quantumvis  subtiliter  excutiamus  medias  causas,  tota  nostra  perspicacia  evanescet.  Sicuti  Aristoteles  in  Meteoris  acumen  suum  ita  exercuit,  ut  de  causis  naturalibus  exactissime  disputet:  omittat  tamen  praecipuum  hoc  caput,  in  quo  rudissimus  quisque  idiota,  vera  saltem  pietate  imbutus,  eum  superat.