48:43  43  IN  ACTA  APOSTOLORUM  44  sequitur  vaticinium  non  solide  nec  perfecte  fuisse  in  eo  impletum.  Quod  autem  omnino  de  Christo  exponi  Psalmus  debeat,  res  ipsa  convincit.  Nam  quum  David  unus  esset  de  filiis  Adae,  illam  universalem  generis  humani  sortem  effugere  non  poterat:  Pulvis  es,  et  in  pulverem  redibis:  apertum  est,  inquam,  omnibus  Adae  filiis  sepulcrum,  quod  ipsos  omnes  deglutiat  et  absumat:  ut  nemo  se  eximere  a  corruptione  possit.  Ita  quum  nos  intuemur  seorsum  a  Christo,  paratum  nobis  sepulcrum  cernimus,  quod  nobis  putredinem  minatur.  Quare,  si  a  Christo  separetur  David,  minime  in  eum  competet  quod  hic  dicitur,  servandum  esse  a  sepulcro.  Quum  ergo  gloriatur  se  expertem  sepulcri  fore,  quod  ad  putredinem  attinet,  procul  dubio  se  in  Christi  corpore  constituit:  in  quo  mors  devicta  est,  atque  abolitum  eius  regnum.  Quod  si  David  non  alia  sibi  ratione  exemptionem  a  sepulcro  promittit,  nisi  quatenus  est  Christi  membrum,  hinc  apparet,  a  Christo  tanquam  a  capite  faciendum  esse  exordium.  Quisquis  sani  erit  iudicii,  facile  agnoscet  valere  hoc  argumentum,  totum  humanum  genus  corruptioni  Deus  subiecit:  ergo  David,  quatenus  unus  erat  ex  hominum  numero,  inde  eximi  non  potuit.  Nec  vero  dubium  est,  quin  Iudaei,  apud  quos  habebatur  haec  concio,  quum  extra  controversiam  axioma  istud  inter  eos  valeret,  a  solo  Christo  sperandam  esse  restitutionem,  ideo  facilius  acquieverint  Petri  dictis:  quia  videbant  non  aliter  constare  quod  verba  sonant  quam  si  ad  Messiam  ventum  esset.  Neque  enim  eo  impudentiae  proruperant,  saltem  isti  quorum  fit  mentio,  ut  auderent  in  rebus  apertis  cavillari.  Deus  enim  pios  et  dociles  auditores  suis  discipulis  tunc  obtulerat  Quaerebant  in*  vetere  testamento  Messiam.  Eius  typum  sciebant  delineatum  fuisse  in  Davide.  Erat  religio  et  scripturae  reverentia.  At  hodie  totius  fere  gentis  desperata  est  impudentia.  Utcunque  urgeantur,  eludunt.  Ubi  nullum  est  effugium,  tamen  perrumpunt.  Victi  nunquam  cedent.  Nec  dubium,  quin  haec  illiberalis  protervia  impietatis  eorum  poena  sit:  sed  redeamus  ad  Petri  concionem.  Quando  non  tantum  praedicat  David  liberatorem  sibi  fore  Deum,  sed  modum  quoque  singularem  exprimit:  nempe,  quod  sepulcri  corruptioni  non  erit  obnoxius,  merito  colligit  Petrus,  id  non  in  ipsum  proprie  competere:  quum  eius  cadaver  in  sepulcro  corruptum  fuerit.  Quia  autem  hoc  dictu  asperum  fuisset  apud  Iudaeos,  verborum  circuitu  duritiem  praemollit.  Non  enim  praecise  uno  verbo  negat,  vere  id  fuisse  in  Davide  impletum,  sed  oblique  tantum  significat,  quia  vulgari  aliorum  more  in  sepulcro  consumptus  iaceat.  Caeterum  ita  de  Christo  vaticinatus  est  David,  ut  et  sibi  privatim  aptarit  hanc  consolationem,  et  extenderit  ad  universum  ecclesiae  corpus.  Nam  quod  in  capite  solidum  est  ac  perfectum,  diffusum  postea  in  singula