3:43  43  INSTITUTION  CHRESTIENNE.  44  pler  la  maiesté  de  Dieu,  se  confesse  terre  et  poudre  (Gen.  18,  27):  comme  Helie  cache  son  visage  n'osant  attendre  telle  approche  (1  Rois  19,  13):  tel  effroy  les  fideles  conçoivent  de  ceste  haute  maiesté.  Et  que  feroit  l'homme  qui  n'est  que  vers  et  pourriture,  veu  qu'il  faut  que  les  Cherubins  et  Anges  du  ciel  se  couvrent  pour  la  peur  et  estonnement  qu'euxmesmes  en  ont  (Es.  6,  2)?  C'est  ce  que  dit  le  Prophete  Esaie,  que  le  soleil  aura  honte,  et  la  lune  sera  confuse,  quand  le  Seigneur  des  armées  regnera  (Es.  24,  23;  2,  10.  19):  c’est  à  dire,  quand  il  desployera  sa  clarté,  ou  qu'il  la  fera  voir  de  plus  pres,  tout  ce  qui  estoit  auparavant  le  plus  clair  du  monde,  sera  en  comparaison  d'icelle  obscurcy  de  tenebres.  Toutesfois  combien  qu'il  y  ait  une  liaison  mutuelle  entre  la  cognoissance  de  Dieu  et  de  nous  mesmes  et  que  l'une  se  rapporte  à  l’autre,  si  est-ce  que  l'ordre  de  bien  enseigner  requiert  qu'en  premier  lieu  nous  traitions  que  c'est  de  cognoistre  Dieu,  pour  venir  au  second  poinct.  CHAPITRE  II.1)  Que  c'est  de  cognoistre  Dieu,  et  à  quelle  fin  tend  ceste  cognoissance.  1.  Or  i'enten  que  nous  cognoissons  Dieu,  non  pas  quand  nous  entendons  nuement  qu'il  y  a  quelque  Dieu:  mais  quand  nous  comprenons  ce  qu'il  nous  appartient  d'en  comprendre,  ce  qui  est  utile  pour  sa  gloire,  brief  ce  qui  est  expedient.  Car  à  parler  droictement  nous  ne  dirons  pas  que  Dieu  soit  cognu,  où  il  n'y  a  nulle  religion  ne  pieté.  Ie  ne  touche  point  encores  ici  à  la  cognoissance  speciale,  par  laquelle  les  hommes  estans  perdus  et  maudits  en  eux,  sont  conduits  à  Dieu  pour  le  tenir  leur  redempteur  au  nom  de  Iesus  Christ:  seulement  ie  parle  de  ceste  pure  et  saincte2)  cognoissance,  à  laquelle  l'ordre  naturel  nous  meneroit  si  Adam  eust  persisté  en  son  integrité.  Car  combien  que  nul  en  ceste  ruyne  et  desolation  du  genre  humain  ne  sente