23:43  43  COMMENTARIUS  IN  GENESIN.  44  scriptores.  Quare  in  eam  competunt  elogia  quibus  Paradisum  commendat  Moses.  Et  regionem  Heden  in  illis  partibus  fuisse  sitam  verisimile  est  ex  Iesaiae  capite  tricesimo  septimo,  versu  duodecimo:  et  Ezechielis  capite  vicesimo  septimo,  versu  vicesimo  tertio.  Caeterum  quod  flumen  egressum  fuisse  narrat  Moses,  de  fluxu  aquae  interpretor:  ac  si  diceret,  Adam  habitasse  in  ripa  fluminis,  vel  in  ea  terra  quae  utrinque  alluebatur,  si  Paradisum  accipere  libeat  pro  utraque  ripa.  Quanquam  non  magni  interest,  sive  infra  confluentem  habitaverit  Adam,  Babylonem  et  Seleuciam  versus,  sive  in  superiori  parte:  satis  est  quod  agrum  irriguum  tenuerit.  Quomodo  autem  fluvius  in  quatuor  fuerit  divisus  capita,  non  obscurum  est.  Duo  enim  sunt  amnes  qui  in  unum  coeunt,  deinde  abeunt  in  diversas  partes.  Ita  flumen  unum  est  in  confluente:  duo  autem  in  superioribus  alveis  sunt  capita,  et  duo  versus  mare,  postquam  rursus  longius  dividi  incipiunt.  Superest  quaestio  de  nominibus  Pison  et  Gihon.  Neque  enim  rationi  videtur  consentaneum,  ut  singulis  fluviis  tribuamus  duplex  nomen.  Sed  minime  novum  est,  ut  nomina  amnes  mutent,  praesertim  ubi  aliqua  insignis  est  discretionis  nota.  Tigris  ipse  (autore  Plinio)  circa  fontem  suum  Diglito  vocatur:  postquam  vero  plures  fecit  alveos,  et  rursus  coalescit,  Pasitigris  est.  Nihil  ergo  absurdi  est  si  dicamus  a  confluxu  diversa  habuisse  nomina.  Adde  quod  inter  Pasin  et  Pison  aliqua  est  affinitas:  ut  non  absimile  vero  sit,  Pasitigris  nomen  antiquae  appellationis  esse  vestigium.  Et  libro  quinto  Quinti  Curtii  De  rebus  gestis  Alexandri,  ubi  Pasitigris  fit  mentio:  quidam  codices  habent,  vocari  ab  accolis  Pasin.  Nec  male  conveniunt  reliquae  circumstantiae,  quibus  tres  ex  fluviis  istis  Moses  designat.  Pison  circuit  terram  Havila  ubi  aurum  nascitur.  Tigri  circuitus  recte  tribuitur,  propter  flexuosum  tractum  infra  Mesopotamiam.  Terra  vero  Havila,  hic  pro  regione  Persidi  vicina,  meo  iudicio,  sumitur.  Nam  infra  capite  vicesimo  quinto,  narrabit  Moses,  Ismaelitas  habitasse  ab  Havila  usque  ad  Sur,  quae  contigua  est  Aegypto,  qua  itur  in  Assyriam.  Opponitur  terminus  Havila  termino  Sur,  quam  Moses  Aegypto  propinquam  facit,  et  quidem  Assyriam  versus.  Unde  sequitur,  Havila  tendere  ad  Susianam  et  Persidem.  Necesse  enim  est,  ut  sit  inferior  Assyria  versus  mare  Persicum:  deinde  procul  dissita  ab  Aegypto:  quia  multos  populos  recenset  Moses  qui  inter  illos  terminos  habitarunt.  Deinde  Nabataeos,  quorum  illic  fit  mentio,  Persis  vicinos  fuisse  constat.  Optime  nunc  convenit  quod  de  auro  et  lapidibus  pretiosis  affirmat  Moses.  Superest  Gihon,  quem  Moses  tradit  alluere  terram  Chus.  Aethiopiam  vertunt  omnes  interpretes:  sed  regio  Madianitarum,  et  regio  Arabiae  contermina,  eodem  etiam  nomine