20:429  429  SUPPLEMENTUM.  430  nunc  quidem  adferre  possim.  Mihi  enim  iusta  est  tacendi  causa,  ubi  plus  quam  sciam  possimque  a  me  exspectatur  aut  quaeritur.  Agnoscitis  nempe  ex  meo  quodam  scripto,  quum  Deum  non  colitis,  nullam  vobis  pacem  conscientiae  constare  posse.  At  illud  multo  peius  habet,  quod  omnem  ex  illo  vestro  carcere  effugiendi  rationem  praecisam  vobis  statuitis.  Quid  dicam?  Miseret  me  vestrae  sortis  et  constrictionis.  Sed  quorsum  illud?  nempe  ut  Dominum  pro  vobis  supplex  orem  ut  in  tantis  infirmitatibus  vos  respiciat,  quod  nobis  omnibus  mutuo  ac  perpetuo  precari  debemus:  ac  non  ut  has  meas  preces  interponendo,  quod  a  vobis  malum  admittitur,  elevem.  Neque  etiam  exspectatis  fortasse  ut  vobis  blandiar:  sed  quum  ita  meam  consolationem  requiritis  ut  mali  aliquando  tollendi  occasionem  omnem  vobis  negatam  adiiciatis,  illud  me  plane  constringit,  ne  quid  ulterius  vobis  respondere  valeam.  Ego  vero  si  vestrae  illae  angustiae  veros  ac  ferventes  gemitus  ad  Dominum  in  vobis  excitarent,  sperarem  exitum  a  Domino  vobis  oblatum  iri.  Sed  quemadmodum  extra  spem  in  illum  sperandum  est,  ita  etiam  extra  media  ad  ipsius  vocationem  sequendam  enitendum  est,  ne  illi  desimus.  Idque  ita  statuendum  est,  ut  quum  omnia  sese  opponere  videbuntur,  et  viae  omnes  claudi  atque  obstrui,  nihilominus  perrumpamus  omnia,  et  nullus  nostris  commodis  vel  rationibus  in  rei  tantae  deliberatione  detur  locus.  Si  penes  me  esset  vobis  manum  quovis  modo  porrigere,  non  committerem  ut  meum  hic  officium  a  vobis  merito  desideraretur.  Quum  aliud  non  possim,  nolite  exspectare  ut  quod  Dominus  a  vobis  requirit  illud  a  me  remitti  possit.  Vestrum  est  potius,  ut  consolationem  accipiant  corda  vestra,  vosmet  inter  vos  ad  illud  ipsum  exhortari,  quod  a  vobis  pro  impossibili  habetur.  Veniat  enim  in  mentem  quantum  sit  illud  malum,  quo  adhuc  detinemini.  Quumque  illud  ita  ut  est  persenseritis,  tum  a  Domino  vires  postulate  ad  luctam,  etiamsi  ad  sanguinem  usque  decertandum  sit.  Inducite  porro  in  animum,  non  esse  praescriptam  vobis  unius  diei  luctam,  quum  ex  Satanae  vinculis  evolaveritis  :  neque  aliter  omnia  peractum  iri  cogitate,  quam  si,  uti  semel  maledictum  illud  quod  vobis  incumbit  iugum  exueritis,  ita  etiam  in  sancta  et  recta  constantia  reliqua  deinde  vita  perstetis.  Nimis  enim  frequentia  sunt  illarum  exempla,  quae  bullarum  instar  momento  a  pietate  exciderunt.  Atque  ita  sibi  consulunt  pessime,  qui  in  aere  aedificant.  Iam  ubi  serio  meditatae  eritis,  quam  non  minus  arduum  sit  perseverantiae  exemplum  quam  plane  necessarium  in  Domini  vocatione,  ut  ad  illud  praestandum  impares  nimium  sumus,  illud  vos  excitet,  ut  ad  Domini  opem  et  praesidium  vos  conferatis.  Sic  enim  illum  abunde  instructum  comperietis  ad  suos  ad  cumulum  suae  erga  ipsos  liberalitatis  perducendos,