8:428  a  fin  que  Dieu  ne  perde  point  sa  peine  ea  nous  appelant  a  soy.  Or,  il  conioint  yci  deux  articles  qui  sont  dignes  d'estre  observez.  Le  premier  est  quand  Dieu  a  parle,  disant:  Cerchez  ma  face,  qu'il  a  respondu  a  ceste  voix  d'une  bonne  affection  de  cueur.  Le  second  est  qu'apres  avoir  dict:  Ouy,  il  dit  qu'il  s'employera  par  effect  a  cercher  la  face  de  Dieu.  Et  de  faict,  voyci  l'ordre  selon  lequel  nous  aurions  a  proceder:  c'est  de  donner  ouverture  et  acces  a  ce  que  Dieu  nous  dit,  selon  aussi  qu'il  nous  est  remonstre  au  Pseaulme  (95,  8):  Auiourd'huy,  en  oyant  sa  voix,  n'endurcissez  pas  vos  cueurs:  mais  il  s'en  trouve  bien  peu  qui  le  facent.  Une  grande  partie  dira  bien  pour  s'acquicter:  Ouy,  c'est  raison;  il  n'est  pas  licite  de  replicquer  a  l'encontre:  mais  il  s'en  fault  beaucoup  que  ce  qu'ils  accordent  de  bouche  leur  entre  iusques  au  cueur.  Ainsi  apprenons  de  commencer  par  ce  bout,  que  nous  respondions  a  Dieu  a  bon  escient,  que  nous  avons  entendu  le  bien  qu'il  nous  fait,  en  nous  conviant  a  veoir  sa  face.  Si  cela  est,  il  ne  se  peut  faire  que  le  reste  ne  s'ensuyve,  a  scavoir,  une  vertu  d'exploicter  ce  que  nous  cognoistrons  nous  estre  si  iustement  commande,  et  pour  nostre  bien  singulier.  Car  David  monstre  qu'il  n'a  point  eu  une  meditation  froide  ou  morte,  sans  remuer  ne  bras  ni  iambes,  mais  qu'en  ayant  conclud  qu'il  Moit  cercher  Dieu,  il  s'est  mis  en  chemin  et  proteste  qu'il  poursuyvra.  Or  c'est  une  grande  honte  a  ceulx  qui  se  disent  Chrestiens,  de  si  mal  practiquer  l'un  et  l'autre.  Aucuns  allegueront  qu'il  ne  leur  est  point  licite  de  quicter  le  pais  de  leur  naissance,  combien  qu'ils  soyent  la  destituez  [f.  58]  de  la  pasture  de  vie,  et  qu'il  n'y  ait  que  desolation  quant  a  l'ordre  de  l'Eglise.  Pourquoy?  A  cause  du  debvoir  qu'ils  ont  a  leur  prince  naturel.  A  quoy  ie  ne  feray  pas  longue  replicque.  Seulement  ie  leur  demande,  s'ils  n'avoyent  que  boire  ne  que  manger  en  leur  maison,  s'ils  y  seroyent  retenus  d'un  tel  scrupule.  Il  n'y  a  celuy  qui  ne  se  dispensait  hardiment  de  quicter  son  pais,  pour  ne  point  mourir  de  faim.  Ie  mettray  un  cas  qui  n'est  pas  encore  tant  privilege,  c'est  que  si  on  leur  presentoit  six  fois  autant  de  biens  qu'ils  ont  en  pais  estrange,  qu'ils  ne  feroyent  pas  grande  difficulte  pour  s'en  aller  tantost  mettre  en  possession.  De  quoy  donc  leur  sert-il  de  pretendre  ces  couleurs,  puis  qu'on  voit  que  c'est  au  plus  loing  de  leur  cueur  qu'ils  parlent?  Il  n'est  pas  yci  question  de  se  retirer  en  terre  d'ennemi,  la  ou  ils  soyent  contraincts  de  porter  armes  contre  leur  prince,  pour  faire  guerre  a  leur  pais  naturel,  mais  seulement  de  cercher  lieu  pour  servir  paisiblement  a  Dieu,  la  ou  rien  ne  les  empesche  qu'ils  ne  prient  pour  leur  prince  et  pour  tous  ses  subiects.  Brief,  telle  retraicte  n'est  autre  que  celles  qui  se  font  tous  les  iours  pour  quelques  commoditez  terriennes,  sans