37:428  nec  tamen  propterea  argui  posse  inconstantiae  aut  levitatis:  quasi  consilium  mutarit.  Consilium  enim  suum  et  iusta  iudicia  exsequetur  in  eos  qui  falso  nominis  eius  praetextu  gloriam  eius  obscurant,  totamque  pietatem  corrumpunt.  16.  (Qui  benedixerit.)  Hic  opponitur  orbis  universus  angulo  Iudaeae,  in  quo  cultus  Dei  quodammodo  conclusus  erat.  Postquam  enim  patefactus  est  ubique  Deus,  non  iam  in  certa  aliqua  regione,  sed  omnibus  in  locis  sine  discrimine  colitur.  Quamadmodum  etiam  docet  Christus  :  Venit  hora  quando  neque  in  monte  hoc,  neque  in  Ierosolymis  adorabitis  patrem.  Et  Paulus  (1.  Tim.  2,  8):  Volo,  inquit,  viros  in  omni  loco  sustollere  puras  manus,  absque  ira  et  disceptatione.  Terrae  igitur  nomen,  quo  hic  universum  orbem  designat,  tacite  Iudaeae  opponit.  Benedictione  et  iureiurando  universum  Dei  cultum  notat.  Iusiurandum  est  species  cultus  Dei,  ut  antea  vidimus:  eo  enim  iudicium  omne  deferimus  Deo:  eumque  testem  et  conscium  rerum  omnium  quae  aguntur  agnoscimus.  Benedicimus  vero,  quum  omnia  prospera  ab  ipso  optamus,  eique  soli  ferimus  accepta.  Denique  non  aliter  nobis  bene  esse  fatemur,  quam  ex  mera  eius  liberalitate.  Per  Deum  verum,  fidelem  in  suis  promissis  et  stabilem  in  suo  consilio  intellige:  quanquam  forte  subest  obliqua  antithesis  inter  veracem  Deum  et  fallaces  gentium  deos.  ,  (Quia  oblivioni.)  Haec  promissio  ad  solos  fideles  pertinet.  Significat  Deus  se  finem  aerumnis  et  malis  impositurum,  ne  sit  perpetua  ecclesiae  calamitas,  quod  fieri  coeptum  est,  quum  e  Babylone  eductus  est  populus.  Tametsi  enim  variis  adhuc  modis  et  in  itinere  et  domi  afflictus  sit,  simul  tamen  adiuncta  fuit  gravibus  poenis  moderatio:  quia  reditus  in  patriam,  templi  instauratio,  restitutio  politiae,  leniebat  dolores  animosque  bona  spe  fulciebat  usque  ad  Christi  adventum.  17.  (Quia  ecce.)  His  metaphoris  promittit  insignem  rerum  mutationem,  ac  si  diceret  Deus,  sibi  in  animo  esse,  atque  etiam  in  manu,  non  modo  restituere  ecclesiam  suam,  sed  ita  restituere,  ut  novam  vitam  obtinere,  atque  in  novo  mundo  habitare  videatur.  Hyperbolicae  sunt  hae  loquutiones:  sed  non  potuit  aliter  exprimi  tanti  beneficii  magnitudo,  quod  adventu  Christi  exhibendum  erat.  Nec  vero  de  primo  tantum  adventu  intelligit,  sed  de  universo  regno,  quod  ad  extremum  usque  adventum  protendi  debet  :  sicuti  iam  aliis  locis  dictum  est.  Itaque  per  Christum  mundus  quodammodo  renovatur.  Unde  etiam  apostolus  ad  Hebr.  saeculum  novum  appellat:  nec  dubium  quin  hanc  prophetae  sententiam  spectarit.  Atqui  loquitur  propheta  de  restitutione  ecclesiae  post  reditum  e  Babylone.  Hoc  quidem  verum  est:  sed  restitutio  illa  manca  est,  nisi  ad  Christum  usque  extendatur.  Atque  nos