32:428  7.  Canite  Iehovae  in  laude,  psallite  Deo  nostro  in  cithara.  8.  Qui  operit  coelos  nubibus,  parat  terrae  pluviam,  germinare  faciens  herbam  in  montibus.  9.  Quia  dat  iumento  cibum  suum,  filiis  corvorum  qui  ad  eum  clamant.  10.  Non  in  fortitudine  equi  placebit  ei,  neque  in  cruribus  viri  oblectabitur,  l  l  .  Oblectatur  Iehova  in  iis  qui  ipsum  timent,  qui  sperant  in  clementia  eius.  7.  (Canite  Iehovae.)  Iterum  hortatur  ad  canendas  Dei  laudes,  et  simul  admonet  minime  deesse  materiam  :  quia  nova  subinde  documenta  potentiae  eius,  bonitatis,  et  sapientiae  se  oculis  nostris  ingerunt.  Primo  dicit  operire  coelos  nubibus,  quae  mutatio  expergefacere  sensus  nostros  debet,  nisi  nimium  stupidi  essemus.  Certe  utcunque  in  coelo  fulgeant  innumera  Dei  miracula,  si  tamen  eadem  semper  maneret  serenitas,  non  tam  conspicua  esset  eius  virtus,  quam  ubi  repente  coelum  obnubilans  subducit  solis  fulgorem,  et  quasi  mundo  novam  faciem  induit.  Postea  admonet,  hoc  modo  cunctis  animalibus  eum  prospicere  :  quia  et  inde  herbae  germinant,  et  succus  terrae  ad  ubertatem  suggeritur.  Ita  cum  potentiae  suae  documento,  gratiae,  paternique  erga  genus  humanum  amoris  specimen  ante  oculos  Deus  proponit:  imo  demonstrat,  ne  feras  quidem  et  pecudes  se  negligere,  Atque  hoc  notatu  apprime  dignum  est,  non  cadere  pluviae  guttam  in  terras  nisi  iubente  Deo.  Inveniunt  quidem  philosophi  pluviae  originem  in  elementis,  neque  vero  negandum  est  ex  crassis  vaporibus  quos  terra  et  mare  exhalat,  nubes  creari:  sed  mediae  causae  Dei  providentiam  obscurare  non  debent  quin  humorem  terrae  suppeditet  gignendis  frugibus  necessarium.  Denique  sicut  terra  calore  dehiscens  quodammodo  sitim  suam  ore  aperto  declarat:  sic  etiam  vicissim  Deus  pluendo  potum  distillat.  Posset  quidem  aliis  occultis  modis  dare  vigorem  ne  deficeret:  sed  irrigatio  qnasi  oculare  spectaculum  est  continuae  quam  de  nobis  gerit  curae.  (Qui  dat  iumento.)  Clarius  specie  una  proposita  explicat  quod  dixit,  Deum  scilicet  victum  cunctis  animalibus  curare.  Quod  autem  iumenta  potius  et  corvos  quam  homines  pasci  dicit,  hoc  ad  amplificationem  valet.  Certum  quidem  est,  hominis  causa  mundum  esse  creatum,  suaque  fertilitate  et  copia  ornari:  et  quo  propius  ad  Deum  accedimus,  eo  magis  suam  erga  nos  beneficentiam  illustrat.  Verum  si  ad  bruta  quoque  animalia  extendere  non  gravatur,  hinc  facile  liquet  nobis  vere  patrem  esse  ac  nutritium.  Ideo  corvos  nominat  contemptissimum  avium  genus,  ut  doceat,  Dei  liberalitatem  penetrare  ad  omnes  mundi  partes.  Quod  autem  pullos  corvorum  dicit  clamare  ad  Deum,  non  dubium  quidem  est  quin  ad  crocitum  alludat.  Interea  tamen  admonet  fateri  suam  egestatem  nisi  Dominus  e  coelo