47:427  427  IN  EVANGELIUM  IOANNIS  428  Christum  a  Galilaea  sequutae  erant.  Verum  hic  nodus  facile  ita  solvitur,  quod  sicuti  Matthaeus  ponit  duarum  nomina,  quae  magis  notae  erant  ac  celebres  inter  discipulos,  ita  Ioannes  contentus  est  unius  tantum  Magdalenae  nomine:  interea  tamen  alias  non  excludit,  imo  ex  verborum  eius  contextu  colligere  promptum  est,  illam  non  fuisse  solam.  Nam  paulo  post  dicit,  Maria  plurali  numero:  Nescimus,  ubi  posuerunt  eum.  Ergo  quamvis  de  comitibus  sileat  Ioannes,  nihil  tamen  narrat  ab  aliis  diversum,  qui  plures  fuisse  commemorant.  De  temporis  varietate  non  difficilis  est  solutio.  Quum  dicit  Ioannes  venisse  ante  lucem,  intellige  superantibus  adhuc  noctis  tenebris  ingressas  fuisse  iter:  antequam  vero  ad  sepulcrum  ventum  foret,  lux  diei  exorta  fuit:  vespere  autem  post  solis  occasum  iam  finito  sabbato  emerant  aromata.  Atque  huc  referri  debet  aliorum  narratio.  Alia  videtur  esse  repugnantiae  species,  quod  Ioannes  dicit  sibi  et  Petro  duntaxat  loquutum  esse  Mariam  :  Lucas  autem  narrat,  ipsam  ad  undecim  apostolos  venisse,  et  eius  sermonem  habitum  pro  delirio.  Sed  facile  discutitur,  quia  Ioannes  collegas  suos  reliquos  consulto  praeteriit:  ipse  enim  et  Petrus  soli  ad  sepulcrum  venerunt.  Quod  Lucas  solius  Petri  meminit,  eiusdem  est  rationis  cum  eo,  quod  nuper  diximus  de  Maria  Magdalena  et  reliquis  mulieribus.  Porro  credibile  est,  alios  novem  discipulos  metu  retentos  esse,  ne  si  turmatim  prodiissent  nimis  fuissent  conspicui.  Nec  obstat  quod  videtur  innuere  Lucas,  spretum  ab  illis  fuisse  Mariae  sermonem,  quia  continuo  post  subiicit,  Petrum  cucurrisse.  Quare  simpliciter  intelligit,  primo  auditu  fuisse  quasi  attonitos,  sed  tandem  collecto  animo  Petrum  illam  sequutum  esse  visendi  causa.  Quod  autem  recitat  Lucas,  Christum  apparuisse  Mariae,  antequam  discipulis  nuntiasset  sepulcrum  esse  vacuum,  inversa  est  narrationis  series:  quod  planum  fit  ex  contextu.  Subiicit  enim  quod  Ioannes  testatur  accidisse,  priusquam  illa  Iesum  videret.  Nec  vero  quidquam  in  eo  est  absurdi,  quum  Hebraeis  tritum  sit  priore  loco  referre,  quod  ordine  temporis  est  posterius.  Prima  sabbatorum.  Non  referunt  evangelistae,  quando  vel  qualiter  resurrexerit  Christus,  quia  illis  satis  fuit  exponere,  quando  et  quibus  innotuerit  eius  resurrectio.  Dicit  ergo  Ioannes  Mariam  venisse  prima  die  sabbatorum.  Ad  verbum  quidem  est  una,  sed  Hebraeis  tritum  est,  unum  ponere  loco  primi,  quia  in  numeris  principium  incipit  ab  unitate.  Quum  autem  septimus  quisque  dies  quieti  esset  dicatus,  totam  hebdomadem  sabbatum  vocarunt,  hoc  honoris  dantes  diei  sanctitati,  ut  reliquum  tempus  denominationem  ab  eo  sumeret.  Venerunt  ergo  mulieres  postridie  sabbati  ad  sepulcrum,  quum  eodem  die,  sed  post  occasum  solis  emissent  aromata,  deinde  clanculum  sub  noctis  tenebris,  ut  in  rebus