47:426  a  communi  ordine  discerneret.  Huc  etiam  valebat  circumstantia  loci,  ut  illustrior  esset  resurrectio  et  historiae,  quae  proximo  capite  sequitur,  non  parum  lucis  afferret.  CATPUT  XX.  1.  Prima  autem  die  sabbatorum  Maria  Magdalena  venit  mane,  quum  adhuc  tenebrae  essent,  ad  monumentum,  et  videt  lapidem  sublatum  e  monumento.  2.  Currit  ergo  et  venit  ad  Simonem  Petrum,  et  ad  alterum  discipulum  quem  diligebat  Iesus,  et  dicit  eis:  Tulerunt  Dominum  e  monumento,  et  nescimus  ubi  posuerunt  eum.  3.  Exivit  ergo  Petrus  et  alter  discipulus  et  venerunt  ad  monumentum.  4.  Currebant  autem  duo  simul,  et  alter  discipulus  praecurrit  celerius  Petro  et  venit  prior  ad  monumentum.  5.  Et  capite  inclinato  videt  posita  linteamina,  non  tamen  ingressus  est.  6.  Venit  ergo  Simon  Petrus  sequens  eum,  et  ingressus  est  in  monumentum  et  videt  posita  linteamina,  7.  Et  sudarium,  quod  fuerat  super  caput  eius,  non  simul  cum  linteis  positum,  sed  seorsum  involutum  in  unum  locum.  8.  Tunc  ergo  ingressus  est  etiam  alter  discipulus,  qui  venerat  prior  ad  monumentum,  et  vidit  et  credidit.  9.  Nondum  enim  noverant  scripturam,  quod  oporteret  Ulum  a  mortuis  resurgere.  1.  Prima  autem  die  sabbatorum.  Quoniam  resurrectio  Christi  praecipuum  est  fidei  nostrae  caput,  et  sine  quo  spes  vitae  aeternae  iacet,  ideo  in  ea  probanda  magis  insistunt  evangelistae,  quemadmodum  hic  noster  multa  testimonia  colligit,  quibus  certi  simus,  Christum  ex  mortuis  resurrexisse.  Posset  tamen  videri  absurdum,  quod  non  proferat  testes  magis  classicos:  nam  a  muliere  initium  facit,  sed  ita  scilicet  impletum  fuit  illud  :  eligi  a  Deo  quod  infirmum  est  in  mundo  et  stultum  et  contemptibile,  ut  sapientiam  et  virtutem  et  gloriam  carnis  confundat  (1.  Cor.  1,  27).  In  discipulis  certe  nihilo  plus  fuit  terrenae  dignitatis  quam  in  mulieribus,  quae  Christum  sequutae  erant:  sed  quia  Christo  placuit  eos  habere  primarios  resurrectionis  suae  testes,  uno  hoc  nomine  satis  sunt  authentici  omnique  exceptione  maiores.  Sacerdotibus  et  scribis  totique  populo  et  Pilato  etiam  nihil  aliud  obstitit,  quominus  Christum  resurrexisse  certo  scirent,  nisi  crassa  et  voluntaria  caecitas.  Fuerunt  igitur  omnes  digni  qui  videndo  non  viderent.  Interea  parvulo  gregi  se  Christus  patefecit.  Caeterum  antequam  ultra  progredimur,  operae  pretium  est  monstrare,  quomodo  inter  se  evangelistae  consentiant,  in  quorum  verbis  apparet  prima  specie  aliquid  dissidii.  Ioannes  nonnisi  unam  Magdalenam  nominat,  Matthaeus  duas,  Marcus  tres,  Lucas  certum  numerum  non  definit,  sed  tantum  commemorat  venisse  mulieres,  quae