37:426  vult,  nec  fictam  audientiam  probat.  Ostendit  autem  unde  factum  sit,  ut  vocationem  respuerent:  quia  scilicet  aures  clauserunt  propheticae  doctrinae  :  quia  initium  parendi  est  afferre  discendi  studium.  In  oculis  tantundem  valet  atque  in  faciem:  qua  loquendi  forma  paulo  ante  usus  est.  Omnes  quidem  in  oculis  Domini  peccant,  nec  quisquam  eius  conspectum  fugere  potest.  Sed  proprie  dicimur  in  oculis  eius  peccare,  quum  ab  ipso  vocati,  praesentiam  eius  non  veremur,  Propius  enim  accedit  ad  eos  quos  per  prophetas  vocat,  et  iis  se  quodammodo  praesentem  exhibet.  Magis  ergo  detestanda  est  eorum  impietas  et  flagris  asperioribus  digna,  qui  Deum  vocantem  ac  propius  invitantem,  quasi  proiecto  omni  pudore,  contemnunt  ac  despiciunt.  Porro  ex  fine  versus  apparet  praecipue  eos  damnari  non  ob  crassa  scelera,  sed  ob  stultas  devotiones,  quibus  vitiabant  Dei  cultum.  Etsi  enim  strenue  operam  dabant  sacrificiis  a  se  confictis,  quod  se  hoc  modo  putarent  Deum  promereri:  ipse  tamen  se  abominari  pronunciat  perversa  eorum  studia.  Non  est  igitur  permissa  cuique  libera  electio,  ut  id  sequatur  quod  magis  placuerit:  sed  quid  probet  Deus  spectandum  nec  ab  eo  ullo  modo  deflectendum  est.  Videmus  autem  non  fuisse  unius  saeculi  vitium,  ut  homines  in  colendo  Deo  libidinem  suam  sequerentur,  et  figmenta  sua  pro  Deo  adorarent:  sed  quantamcunque  voluptatem  ex  iis  capiant  homines,  Dominus  ea  se  damnare  atque  exsecrari  testatur.  13  et  14.  {Propterea.)  Hic  etiam  clarius  propheta  discernit  hypocritas  qui  locum  occupabant  in  ecclesia  Dei  a  veris  filiis  et  germanis.  Nam  etsi  promiscue  omnes  filios  se  vocarent,  tamen  plures  e  familia  abdicandos  esse  ostendit:  et  qui  superbe  et  arroganter  populi  Dei  nomine  se  efferebant,  spe  sua  (quae  fallax  et  inanis  erat)  frustrandos  esse.  Est  enim  diligenter  notanda  antithesis,  quae  magni  est  ponderis,  inter  servos  Dei  et  eos  qui  falso  nomen  eius  obtendunt.  Nam  iis  inanes  titulos  et  falsam  iactationem  aut  vanam  persuasionem  nihil  profutura  esse  docet.  (Comedent,  bibent.)  His  verbis  felicitatem  et  prosperum  vitae  statum  designat,  ac  si  diceret,  curae  sibi  fore,  ne  qua  re  indigeant  fideles.  Sed  videtur  Dominus  aliud  promittere  servis  suis,  quam  quod  re  ipsa  praestat.  Saepe  enim  esuriunt  ac  sitiunt:  quum  interea  impii  affluant  bonis  omnis  generis,  atque  ad  luxum  et  intemperantiam  abutantur.  Sed  observandum  est  regnum  Christi  hic  describi  sub  figuris,  quoniam  aliter  ipsum  comprehendere  non  possemus.  Ideo  prophetae  similitudines  ducunt  a  regnis  terrenis,  in  quibus  dum  opulentia  floret  populus/  bonisque  omnis  generis  fruitur,  conspicua  est  Dei  benedictio  ex  qua  censetur  paternus  eius  amor:  sed  quia  in  terrenis  commodis