47:424  animi  fortitudo,  ut  in  extrema  desperatione  intrepide  in  lucem  prodeant?  Omitto  manifestum  discrimen,  quod  subire  necesse  fuit:  sed  hoc  magnum  est,  quod  aeternum  cum  gente  sua  bellum  suscipere  non  dubitarunt.  Certum  ergo  est  coelesti  impulsu  factum  esse,  ut,  qui  vivo  debitum  honorem  propter  metum  non  detulerant,  quasi  mutati  in  novos  homines  accurrant  ad  cadaver  mortui.  Afferunt  ipsi  sua  aromata  ad  condiendum  Christi  corpus,  sed  hoc  nunquam  fecissent,  nisi  odore  mortis  eius  perfusi  et  imbuti.  Unde  apparet  quam  vere  dictum  esset  ab  ipso  Christo:  Nisi  granum  frumenti  mortuum  fuerit,  ipsum  solum  manet:  postquam  autem  mortuum  est,  abunde  fructificat  (supra  12,  24).  Nam  mortem  prae  vita  ipsa  fuisse  vivificam,  illustre  hic  habemus  documentum.  Et  tantum  valuit  odoris  suavitas,  quem  spiravit  mors  Christi  in  istorum  duorum  hominum  animos,  ut  omnes  carnis  affectus  facile  exstinxerit.  Quum  in  illis  regnaret  opum  amor  et  ambitio,  insipida  erat  Christi  gratia:  nunc  vero  totus  mundus  illis  sapere  desinit.  Caeterum  sciamus  eorum  exemplo  nobis  praescribi  quidnam  Christo  debeamus.  Illi  duo,  ut  fidei  suae  specimen  ederent,  Christum  e  cruce  sublatum  non  sine  ingenti  periculo,  constanter  tamen  in  sepulcrum  tulerunt.  Turpis  ergo  et  pudenda  ignavia  est,  si  regnantem  in  coelesti  gloria  fidei  confessione  fraudamus.  Quo  etiam  minus  excusabilis  est  eorum  improbitas,  qui  quum  hodie  perfida  simulatione  Christum  abnegent,  Nicodemi  tamen  exemplum  praetexunt.  Ac  una  quidem  in  re  similes  esse  fateor,  quod  Christum  quantum  in  se  est  sepultum  curant:  sed  nunc  non  est  sepeliendi  tempus,  ex  quo  adscendit  ad  patris  dexteram,  ut  supra  homines  et  angelos  conspicuus  emineat,  et  omnis  lingua  summum  eius  imperium  praedicet  (Phil.  2,  9.  10).  Occultus  propter  metum  Iudaeorum.  Quia  metus  hic  sanctae  constantiae  opponitur,  quam  operatus  est  spiritus  Domini  in  corde  Ioseph,  probabile  est  non  caruisse  vitio.  Non  quod  omnis  metus,  quo  sibi  fideles  a  tyrannis  et  evangelii  hostibus  cavent,  vitiosus  sit,  sed  quia  sese  prodit  fidei  imbecillitas,  quoties  metu  supprimitur  fidei  confessio.  Semper  videndum  quid  mandet  Dominus,  et  quousque  nos  progredi  iubeat.  Qui  cessat  in  medio  cursu,  Deo  se  non  fidere  ostendit  et  nihil  excusationis  habet,  qui  pluris  vitam  suam  facit  quam  Dei  mandatum.  Quod  evangelista  titulo  et  honore  discipuli  Ioseph  dignatur,  quo  tempore  nimis  timidus  erat,  nec  testari  audebat  fidem  suam  coram  mundo,  hinc  agnoscimus,  quam  clementer  agat  Dominus  cum  suis  et  quam  paterne  eorum  vitiis  ignoscat.  Neque  tamen  est  cur  sibi  blandiantur  falsi  Nicodemitae,  qui  non  tantum  occultam  intus  fidem  retinent,  sed  dum  consensum  simulant  cum  impiis  superstitionibus  quantum  in  se  est  Christi  se  negant  esse  discipulos.